नेदरल्याण्डको फराकिलो जित

एजेन्सी ।  नेदरल्याण्डले युरोकप छनोटमा विजयी सुरुवात गरेको छ । छनोट अन्तर्गत बिहिबार राति भएको खेलमा नेदरल्याण्डले बेलारुसलाई ४-० गोल अन्तरले पराजित गर्यो ।

घरेलु मैदानमा नेदरल्याण्डलाई जित दिलाउन मेम्फिस डिपेले दुई गोल गरे । यस्तै जर्जियानो विज्ल्यान्डम र भिर्जिल भान डिज्कले एक एक गोल गरे ।

बेलारुसविरुद्ध नेदरल्याण्डले पहिलो मिनेटमै डिपेको गोलबाट अग्रता बनाएको थियो । खेलको २१ औं मिनेटमा विज्ल्यान्डमले गोल गर्दै नेदरल्याण्डको अग्रता २-० को बनाए ।

खेलको ५५ औं मिनेटमा डिपेले पेनाल्टीबाट व्यक्तिगत दोस्रो गोल गर्दै नेदरल्याण्डको अग्रता ३-० को बनाए । यस्तै खेलको ८६ औं मिनेटमा भान डिज्कले गोल गर्दै नेदरल्याण्डलाई ४-० को जित दिलाए ।

जितसंगै समूह ‘सी’ मा रहेको नेदरल्याण्डले ३ अंक जोडेको छ ।

यस्तै अर्को खेलमा नर्दन आयरल्याण्डले स्टोनियालाई २-० गोल अन्तरले हराएको छ।