काठमाडौं । फोनेपेले आधिकारिक रूपमा सिटीपेलाई आफ्नो पारिस्थितिकी प्रणालीमा एकीकृत गरिएको दशौँ डिजिटल वालेटको रूपमा स्वागत गरेको छ । यस उपलब्धिले नेपालमा सहज, सुरक्षित र समावेशी डिजिटल भुक्तानी वातावरण निर्माण गर्ने फोनेपेको दृष्टिलाई अझ बलियो बनाउने विश्वास गरिएको छ ।

यस साझेदारीमार्फत, सिटीपे वालेट प्रयोगकर्ताहरू अब फोनेपेको राष्ट्रव्यापी अन्तरसञ्चालित क्यूआर नेटवर्क पहुँच गर्न सक्नेछन्, जसले गर्दा उनीहरूले देशभर १.७ मिलियनभन्दा बढी व्यापारी आउटलेटहरूमा भुक्तानी गर्न सक्नेछन् ।

हाल, फोनेपे नेटवर्कले ६० भन्दा बढी बैंक र वित्तीय संस्थाहरूलाई जोडेको छ र बढ्दो संख्यामा वालेट साझेदारहरूलाई पनि समेटेको छ । यसले लाखौँ प्रयोगकर्ताहरूलाई सुरक्षित र तत्काल डिजिटल लेनदेनको सुविधा प्रदान गर्दछ । सिटीपेलाई स्वागत गर्दै, फोनेपेले वित्तीय समावेशीकरण बढाउने र नेपालभर नगद रहित कारोबार प्रवर्द्धन गर्ने आफ्नो भूमिकालाई अझ सुदृढ बनाउने कम्पनीके विश्वास छ ।

फोनेपेका सीईओ दिवस कुमारले भने, “हाम्रो पारिस्थितिकी प्रणालीमा सिटीपे स्वागत गर्नु हाम्रो यात्रामा एक महत्त्वपूर्ण कदम हो । प्रत्येक नयाँ एकीकरणले नेटवर्कलाई बलियो, समावेशी र नेपालका जनताको लागि अझ मूल्यवान बनाउँछ । हाम्रो उद्देश्य केवल वालेट र बैंकहरूलाई जोड्नु मात्र होइन, प्रत्येक व्यक्तिलाई र व्यवसायलाई डिजिटल भुक्तानीको वास्तविक सुविधा र विश्वास अनुभव गराउन हो ।”

त्यस्तैगरी, सिटीपेका सीओ विनय रेग्मीले यो साझेदारीले केवल प्रविधिबारे नभइ लाखौँ रेमिट्यान्स लाभार्थीलाई सशक्त बनाउने बताए । सिटीपे र फोनेपेसँगै लाखौँ प्रयोगकर्ता र व्यापारीहरूलाई सहज, सुरक्षित र तत्काल लेनदेन गर्न सक्षम बनाउनेछन् । यो एकीकरणले देशभर ग्राहकहरूलाई सहज, भरपर्दो भुक्तानी अनुभव सुनिश्चित गर्ने अपेक्षा गरिएको छ ।