मौसमका कारण १५ दिनदेखि उडान अवरुद्ध

भोजपुर । तराईको मौसम बिग्रेका कारण नेपाल वायु सेवा निगमको भोजपुर-विराटनगर हवाई सेवा अवरोध भएको छ ।

मौसममा खराबी आएपछि करीब १५ दिनबाट उडान हुननसकेको नेपाल वायु सेवा निगम भोजपुर शाखले जानकारी दिएको हो । अब मौसममा सुधार आएपछि मात्र भोजपुर-विराटनगर उडान हुने निगमका भोजपुर सहायक स्टेशन प्रमुख राजु मिजारले जानकारी दिए । निगमको जहाजले मंगलवार, बिहीवार, शनिवार गरी हप्तामा तीन दिन विराटनगर उडान भर्दै आएको थियो ।

निगमले अपाङ्गता भएका व्यक्तिलाई भाडा ५० प्रतिशत, विद्यार्थीलाई २५ प्रतिशत छुट दिँदै आएकामा ज्येष्ठ नागरिकलाई पनि १५ प्रतिशत छुटको व्यावस्था गरेको छ । भोजपुर-विराटनगर उडान अवरुद्ध भए पनि भोजपुर–काठमाडौं भने आइतवारबाहेक हप्तामा छ दिन उडान भइरहेको निगमले जानकारी दिएको छ ।