एक युगको अन्त्य : जर्मन चान्सलर मर्केलद्वारा पार्टीको नेतृत्व त्याग्ने घोषणा

काठमाडाैं । जर्मन चान्सलर एन्गेला मर्केलले दुई दशकसम्मको पार्टी नेतृत्वबाट विश्राम लिँदै पार्टीको नेतृत्व त्याग्ने घोषणा गर्दैछिन्। अब पार्टी नेतृत्वका लागि मर्केलका अनुयायी र लामो समयदेखि उनका आलोचना गर्नेहरुबीच प्रतिस्पर्धा हुनेछ।

यस प्रतिस्पर्धाको नतिजा सन् २०२१ सम्म चान्सलर पदमा रहने वा नरहने भन्ने विषयमा ६४ वर्षीया मर्केलका लागि निर्णायक हुनेछ। उनले यसअघि नै सन् २०२१ बाट राजनीतिबाट सन्यास लिने घोषणा गरिसकेकी छिन्। आप्रवासी र शरणार्थीका बारेमा नरम नीति अख्तियार गरेको भनी आलोचनाका साथै सोही कारण पछिल्ला समयमा भइरहेका चुनावमा पराजय भएसँगै मर्केलमाथि क्रिस्चियन डेमोक्रेटिक पार्टी (सीडीयू) छाड्ने दबाब बढेको हो।

‘१८ वर्षसम्म पार्टीको अध्यक्षता गर्न पाएकामा मलाई गर्व लागेको छ । यो निकै लामो अवधि हो, र यसबीचमा सीडीयूमा धेरै उतारचढाव आएको छ,’ ह्यामबर्गमा आयोजित पार्टी भेलाका क्रममा पत्रकारहरुसँग कुरा गर्दै मर्केलले बताइन्। ‘तर हामीले मिलेरै चारवटा चुनाव जित्यौं, र म सन् २०२१ सम्म चान्सलर अवश्य रहनेछु,’ उनले भनिन्। मर्केलले सन् २००५ देखि जर्मनीको नेतृत्व गरिरहेकी छन्, र पार्टी एवं देशलाई युरोप र विश्वकै राजनीतिक केन्द्रका रुपमा उभ्याएकी छन्।

दुईजना मुख्य प्रतिस्पर्धीहरु सीडीयूका उपप्रमुख आन्नीग्रेट क्राम्प–कारेन्बर (एकेके भनेर चिनिने) र कर्पोरेट वकील फ्रेड्रिक मर्जमाथि मर्केलको पदचिन्ह पछ्याउने वा त्याग्ने भन्नेमा विवाद र बहस जारी छ। तेस्रो प्रतिस्पर्धीका रुपमा रहेका स्वास्थ्यमन्त्री हेन्स स्पान्ह भने निकै पछि छन्। उनी चान्सलर मर्केलका कटु आलोचक हुन्।

उनले जर्मनीमा दश लाखभन्दा बढी आप्रवासी र शरणार्थीलाई जर्मनीमा स्वागत गर्ने मर्केलको नीतिमाथि खुलेरै आलोचना गरिरहेका छन्। ‘मर्केल युगको अब अन्त्य हुँदैछ,’ राजनीतिक विश्लेषक एवं एकेकेका जीवनी लेखक क्रिस्टिना डन्जले बताए। ह्यामबर्गमा पार्टीका एक हजार प्रतिनिधि भेला भइसकेका छन्। उनीहरुले पार्टीको नयाँ नेतृत्व चयनका लागि मतदान गर्नेछन्। एकेकेमाथि मर्केलको बलियो सहयोग र समर्थन रहेको विश्वास गरिन्छ।

मर्केलका निकट मानिएका अर्थमन्त्री पिटर अल्टमायरले पार्टीलाई एकताबद्ध गराउन सक्ने व्यक्ति एकेके नै रहेको भन्दै खुलेर समर्थन गरेका छन्। सीडीयूले जुनसुकै धार समाए पनि सत्ता साझेदार दल सोसल डेमोक्र्याट्स (एसपीडी) ले मर्केलको भविष्य निर्धारण गर्नसक्ने अनुमान पनि गरिएको छ। एसपीडी धेरै लामो समयदेखि मर्केलको छायाँमा परेको भन्दै पार्टी्भित्रै आलोचना पनि भइरहेको छ।