जिपको ठक्करबाट साइकलमा सवार दिदीबहिनीको मृत्यु

काठमाडौं । दाङको देउखुरीमा जीपको ठक्करबाट साइकलमा सवार दिदी बहिनीको मृत्यु भएको छ । लमही-भालुवाङ सडकखण्डको राप्ती गाउँपालिका-८ पिपरीमा पूर्वबाट पश्चिमतर्फ गइरहेको प्र३-०१०२२ च १३६९ नम्बरको जीपले बुधबार साँझ सोही दिशातर्फ गइरहेको साइकललाई ठक्कर दिँदा दुर्घटना भएको हाे ।

दुर्घटना परी प्यूठानको झिमरूक गाउँपालिका-१ घर भइ हाल राप्ती गाउँपालिका-८ पिपरी बस्दै आएकी ३५ वर्षीया राधा बस्नेत र उनकी बहिनी १६ वर्षीया विपना केसीकाे मृत्यु भएको जिल्ला प्रहरी कार्यालय दाङका प्रहरी प्रवक्ता एवं प्रहरी नायव उपरीक्षक जनकबहादुर मल्लले जानकारी दिए ।

जीपको ठक्करबाट गम्भीर घाइते राधाको लमही अस्पतालमा तथा विपनाको क्रिसमस अस्पताल रुपन्देहीमा उपचारका क्रममा मृत्यु भएको हो । ठक्कर दिने जीपका चालक फरार रहेकाले खोजी कार्य जारी रहेको प्रहरीले जनाएको छ ।