११७ पालिकाको अन्तिम नतिजा सार्वजनिक, कांग्रेस अग्रस्थानमा

स्थानीय तह सदस्य निर्वाचन २०७९ को नतिजा आउने क्रम जारी रहेको छ। अहिले देशभरका विभिन्न स्थानीय तहको मतगणना जारी छ। केही स्थानहरुमा नतिजा आइसकेको छ भने केही स्थानमा आउने क्रममा छ।

स्थानीय तह सदस्यको निर्वाचनमा काठमाडौं महानगर र भरतपुर महानगरपालिकालाई विशेष चासोका साथ हेरिएको छ । अहिले यी दुई महानगरमा मतगणना कार्य जारी छ । निर्वाचन आयोगले जेठको ५ गतेसम्म मतगणना कार्य सम्पन्न गर्ने लक्ष्य राखेको छ।

मत गणनाको प्रारम्भिक नतिजा अनुसार काठमाडौं महानगरपालिकामा मेयरका स्वतन्त्र उम्मेदवार बालेन्द्र शाह अग्र स्थानमा छन् । त्यस्तै नेकपा एमालेका मेयरका उम्मेदवार केशव स्थापित दोस्रो स्थानमा रहँदा तेस्रो स्थानमा गठबन्धनबाट नेपाली कांग्रेसकी उम्मदेवार सिर्जना सिंह रहेकी छन्।

त्यस्तै भरतपुर महानगरपालिकामा नेकपा एमालेबाट मेयरका उम्मेदवार विजय सुवेदी र गठबन्धनको तर्फबाट नेकपा माओवादी केन्द्रकी उम्मेदवार रेनु दाहालको प्रतिष्पर्धा चलिरहेको छ।

हालसम्म देशभरका ७५३ पालिका मध्ये ११७ तहको अन्तिम नतिजा सार्वजनिक भएको छ । जसमध्ये नेपाली कांग्रेस अग्रस्थानमा छ। उसले ४५ तहमा जित हात पार्दा २४५ तहमा अग्रस्थानमा रहेको छ । यस्तै नेकपा एमालेले ४२ तहमा जित हात पारेको छ । १६३ तहमा अग्रस्थानमा छ ।

माओवादी केन्द्रले २६ तहमा जित हात पारेको छ भने ८८ तहमा अगाडि छ । एकीकृत समाजवादीले २ तहमा जित र १५ तहमा अग्रस्थानमा छ । यस्तै स्वतन्त्र उम्मेदवारले २ स्थानमा जित हात पारेका छन् । २४ स्थानमा स्वतन्त्र, जसपा र राप्रपाका उम्मेदवार अगाडि रहेका छन् ।