इन्टेग्रीटी आइकन नेपाल-२०२१ बाट पाँच राष्ट्रसेवक कर्मचारी सम्मानित

इन्टेग्रीटी आइकन नेपाल २०२१ बाट यसवर्षका पाँचजना राष्ट्रसेवक कर्मचारी सम्मानित भएका छन्। सम्मानित हुनेमा भेरी अस्पताल, बाँकेकी नर्सिङ अधिकृत शिला शर्मा, नवलपुरकी प्रमुख जिल्ला अधिकारी मनमाया भट्टराई पंगेनी, मकवानपुरगढी गाउँपालिकाका कृषि अधिकृत चन्द्रकान्त चौधरी, भक्तपुर अस्पतालकी मेडिकल सुपेरिटेन्डेण्ट डा. सुमित्रा गौतम र भाषा आयोगका उप–सचिव डा. लोकबहादुर लोप्चन रहेका छन्।

यसवर्ष पनि कोभिड–१९ को जोखिम कायमै रहेकाले सम्मान कार्यक्रम सिमित व्यक्तिको उपस्थितिमा सम्पन्न गरिएको थियो। १०० जनाको प्रत्यक्ष सहभागिता रहेको कार्यक्रमको सामाजिक सञ्जालबाट गरिएको प्रत्यक्ष प्रशारण १० हजार भन्दा बढी व्यक्तिले हेरेका थिए।

पाँच जना आईकन सार्वजनिक भईसकेपछि उनीहरूलाई चिनाउन र यस अभियानमा आम नागरिकलाई सहभागी गराउन सामाजिक सञ्जालहरूबाट विभिन्न अभियानहरू सञ्चालन गर्नुका साथै जिल्लास्थित सञ्जाल पनि परिचालन गरिएको थियो। सेवाग्राहीको सुझावको आधारमा पाँचै जनालाई छुट्टाछुट्टै टाईटलबाट अवार्ड गरिएको छ। जस अन्तर्गत, शिला शर्मा “दृढ र सहृदयी”, मनमाया भट्टराई पंगेनी “प्रेरणादायी र निडर”, चन्दकान्त चौधरी “नवप्रवर्तनकारी र दुरदर्शी”, डा. सुमित्रा गौतम “कर्मनिष्ठ र रुपान्तरणकारी”, र डा. लोकबहादुर लोप्चन “अटल र लगनशिल” टाईटलबाट सम्मानित भएका थिए।

“इन्टेग्रिटी आईकन २०२१” बाट सम्मानित हुने पाँचै जनालाई बधाई तथा शुभकामना दिँदै कार्यक्रममा अतिथि वक्ता एवं राजनीतिक विश्लेषक हरी शर्माले भने, “आइकन बिम्ब हो, जुन हामीमा जागेर आउनुपर्छ। उसमा निर्णयको स्वायत्तता हुनु पर्दछ। जसमा निर्णयको स्वायत्तता छैन भने त्यो बहकिन्छ।”

त्यस्तै अर्का अतिथी वक्ता एवं वाग्मती प्रदेशका पूर्वप्रमुख तथा सिएनएन हिरो अनुराधा कोइरालाले भनिन्, “राम्रो काम गर्ने मान्छे बिचलित नभएर सेवालाई निरन्तरता दिने हो भने, ऊ अरुको लागि पनि उदाहरण बन्न सक्छ।”