सवारीसाधनमा जाेर-बिजाेर लागू, राति हिँडडुलमा पनि रोक

काठमाडौँ । सरकारले काठमाडौँ उपत्यका र दुई सयभन्दा बढी सक्रिय संक्रमित भएका जिल्लामा बेलुका ९ बजेदेखि बिहान ५ बजेसम्म सवारी अवागमन बन्द गरेको छ । कोरोनाको संक्रमण बढ्दै गएको देखिएपछि सरकारले आजैदेखि लागु हुने गरि रातिमा सवारी आवागमन बन्द गरेको हो ।

बन्दाबन्दी खुकुलो भएसँगै मुलुकभर कोरोना सङ्क्रमणको जोखिम बढेको भन्दै सरकारले आजदेखि जोरविजोर नम्बरका आधारमा यातायातका साधन चल्न दिने भएको छ । काठमाडौँ उपत्यका र कोभिड–१९ को २०० भन्दा बढी सक्रिय सङ्क्रमित भएका जिल्लामा अत्यावश्यक सेवाबाहेका सार्वजनिक र निजी सवारी साधन जोर बिजोर नम्बरका आधारमा चल्ने गृह मन्त्रालयले जनाएको छ ।

त्यस्तै काठमाडौँ उपत्यका प्रवेश गर्ने अत्यावश्यक ढुवानीबाहेकका सबै यात्रुवाहक सवारी साधनलाई बेलुका ७ देखि बिहान ७ बजेसम्म निषेध गरिएको व्यवस्थालाई कडाईका साथ लागू गर्ने निर्णय भएको मन्त्रालय प्रवक्ता चक्रबहादुर बुढाले जानकारी दिएका छन् ।

स्वास्थ्य तथा जनसङ्ख्या मन्त्रालयद्वारा जारी जनस्वास्थ्यका मापदण्ड तथा गृह मन्त्रालयद्वारा जारी सुरक्षा मापदण्ड कडाईका साथ पालना गर्ने, गराउने, मास्क नलगाउने वा जनस्वास्थ्यका मापदण्डको उल्लङ्घन गर्ने व्यक्तिलाई दण्ड जविरवाना गर्ने र जनस्वास्थ्य मापदण्ड तथा सुरक्षा मापदण्ड उल्लङ्घन गर्ने व्यक्ति समूह तथा संस्था भए सोको सञ्चालकसमेतलाई कारबाही गरिने मन्त्रालयले जनाएको छ ।

नेपाल सरकारको निर्णयबमोजिम आगमन अनुमति पाएका व्यक्तिबाहेक अन्तर्राष्ट्रिय सीमा नाकामा हुने आवातजावतलाई कडाइका साथ निषेध गर्ने, होटल, रेष्टुरेन्टमा हुने सामूहिक भोज, पार्टी, सेमिनार वा अन्य सामूहिक भेलाजस्ता कार्य निषेध गरिएको प्रवक्ता बुढाद्वारा जारी विज्ञप्तिमा जनाइएको छ ।

यसैगरी कोभिड–१९ को सङ्क्रमणको जोखिमको विश्लेषण गरी जोखिम बढेको क्षेत्र÷स्थानलाई जिल्ला कोभिड सङ्कट व्यवस्थापन केन्द्रले निर्णय गरी तुरुन्त बन्द गर्ने, कोभिड–१९ को थप परीक्षणको व्यवस्था मिलाउने पनि मन्त्रालयले जनाएको छ ।

राति हिँडडुलमा पनि रोक
कोरोना भाइरसको संक्रमण बढ्न थालेपछि भोलि बिहीबारदेखि लागू हुने गरी सवारीसाधनमा जोरबिजोर प्रणाली लागू गरेको सरकारले राति हिँडडुलमा पनि रोक लगाएको छ । गृहमन्त्रालयद्वारा सूचनामा उल्लेख भए अनुसार राति ९ बजेदेखि बिहान ५ बनेसम्म हिँडडुल पनि गर्न पाइने छैन।

यो नियम जोरबिजोर प्रणाली लागू भएको ठाउँका लागि हो । सरकारले काठमाडौं उपत्यका र सक्रिय संक्रमितको संख्या २ सय नाघेका जिल्लामा जोरबिजोर लागू गरेको हो। अत्यावश्यक सेवामा भने यो निर्णय लागू हुने छैन ।