धनगढी । सरकार विरुद्ध नेपाल तरुण दलले सोमबार धनगढीमा बृहत् बिरोध प्रदर्शन गरेको छ । सरकारले बढ्दो महंगी, भ्रस्टाचार नियन्त्रण गर्न नसकेको र शान्ती सुरक्षा कायम गर्न नसकेको बिरोधमा तरुण दलले बिरोध प्रदर्शन गरेको हो ।धनगढीको ट्राफिक चौराहबाट सुरु भएको बिरोध र्‍यालीमा सहभागीहरुले डाक्टर गोबिन्द केसीको माग पूरा गर, महंगी नियन्त्रण गर, शान्ति सुरक्षा कायम गर, निर्मलालाई न्याय दे लगायतका नारा लगाएका थिए । जुलुस पार्क मोडमा पुगेर कोणसभामा परिणत भएको थियो ।प्रधानमन्त्रीलाई राजा र राष्ट्रपतिलाई ऐश्वर्य नबन्न अध्यक्ष बस्नेतको आग्रह
तरुण दलका अध्यक्ष जीतजंग बस्नेतले ७ वटै प्रदेशमा सरकारविरुद्ध चलाइएको अभियानबाट जोश, जाँगर र उर्जा थपिएको बताएका छन् । धनगढीमा आयोजित विरोध सभालाई सम्बोधन गर्दै अध्यक्ष बस्नेतले भने, ‘‘अभियानबाट जोश–जाँगर र उर्जा थपिएको छ । यो उर्जाले सरकार ढाल्न सक्छौ भन्ने लागेको छ ।’’अध्यक्ष बस्नतेले प्रधानमन्त्री केपी ओलीलाई राजा वीरेन्द्र र राष्ट्रपति विद्यादेवी भण्डारीलाई रानी ऐश्वर्य नबन्न अनुरोध गरे । उनले कञ्चनपुरकी १३ वर्षिया बालिका निर्मला पन्तका हत्यारालाई सरकारले नै संरक्षण गरिरहेको आरोप लगाउँदै गृहमन्त्री रामबहादुर थापाका छोरा प्रतीकको पोलीग्राफ परीक्षण गर्न माग गरे ।उपाध्यक्ष उत्तम चापागाईंले दुई तिहाइको शक्तिको बलमा सरकारले कांग्रेसको नेतृत्वमा हासिल भएका राजनीतिक उपलब्धि मास्न खोजेको आरोप लगाए । कम्युनिष्ट नेतृत्वको सरकार देश र जनताले उपभोग गर्न पाउने नैसर्गिक अधिकार खोस्न लागेको टिप्पणी गर्दै त्यसका विरुद्ध नेपाली जनता एक हुने समय आएको बताए ।कोषाध्यक्ष विद्धान गुरुङले सरकारले पटक–पटक मूल्यवृद्धि गर्दा पनि नेकपाको भ्रातृ संगठन केही नबोलेकोतर्फ ईंगित गर्दै अनेरास्ववियुकी अध्यक्षसमेत रहेकी नेकपा नेतृ नवीना लामालाई चुप लाग्नुको कारण सोधे ।तरुण दलले माघ ९ गते प्रदेश नम्बर २ को जनकपुरमा, माघ १० गते प्रदेश नम्बर ३ को हेटौंडामा, माघ ११ गण्डकी प्रदेशको पोखरामा, माघ १२ गते प्रदेश नम्बर ५ को भैरहवा, माघ १३ कर्णाली प्रदेशको सुर्खेतमा सरकारविरुद्ध कार्यकर्ता सडकमा उतारेको थियो ।तरुण दलले घोषणा गरेको सरकारविरुद्धको आन्दोलनलाई सघाउन कांग्रेसले ७७ वटै जिल्ला कार्यसमितिलाई परिपत्र गरेको थियो ।