काठमाडौँ । विगत चार वर्षदेखि वस्तु व्यापारतर्फ मुलुककै सबैभन्दा बढी कर तिर्दै आएको भाटभटेनी सुपरमार्केटका सञ्चालक मीनबहादुर गुरुङले आफ्नो व्यावसायिक जीवन अनेकौं आरोह-अवरोहले भरिएको बताएका छन् ।
कर दिवसका अवसरमा सरकारबाट सम्मानित भएपछि उनले भोगेका चुनौती र सफलताको कथालाई एक ‘मीठो पीडा’ (स्वीट पेन) को संज्ञा दिए । ‘मलाई कहिले कीर्ते भनिन्छ, कहिले जेल हालिन्छ, कहिले (सुपरमार्केट) जलाइन्छ । यी सबै मेरा लागि ‘स्वीट पेन’ हुन्,’ गुरुङले भने । उनले आफूमाथि लागेका अनेक आरोप र व्यापारमा भएका क्षतिलाई सहर्ष स्वीकार गर्दै अघि बढेको उल्लेख गरे ।
कुनै समय मूल्य अभिवृद्धि कर (भ्याट) छलीको आरोपमा जरिवाना तिर्नुपर्दाको तितो अनुभव सुनाउँदै उनले भने, ‘त्यतिबेलाको कारोबार आम्दानीले मैले जरिवाना तिर्न सक्ने अवस्था थिएन ।’ तर, त्यही घटनाले आफूलाई थप मेहनत गर्न प्रेरित गरेको उनले बताए । २ अर्बको कारोबारबाट सुरु भएको भाटभटेनी अहिले ३३ अर्बको विशाल व्यावसायिक साम्राज्य बन्नुमा त्यही मेहनत र दृढताले काम गरेको उनको भनाइ छ ।
आगजनीको ठूलो क्षति र पुनर्निर्माणको अठोट
गुरुङले गत भदौ २३ र २४ गते भएको आगलागीबाट सुपरमार्केटमा ठूलो क्षति पुगेको बताए । ‘विगतमा वर्षौं आन्दोलन हुन्थ्यो, अहिले एकै दिनमा ठूलो क्षति भयो । सबै बीमाले कभर गरेन,’ उनले भने । यति ठूलो क्षतिपछि पनि आफू उठ्नुपर्छ भन्ने अठोटका साथ लागिपरेको उनले बताए । ‘म डुब्दा बैंक डुब्छ, रोजगारी जान्छ भनेर पनि मलाई उठ्नैपर्ने थियो,’ उनले भने ।
कुनै राजनीतिक पार्टीलाई भवन बनाइदिने विषयलाई लिएर सुपरमार्केट जलाइएको हल्ला चले पनि गुरुङले त्यसलाई आफ्नो व्यक्तिगत चासोको विषय भएको र त्यही कारणले जलाइयो भन्नु आफ्नो गल्ती भएको महसुस गरेको बताए ।
नाफा दानमा लगाउने इच्छा
कर दिवसमा सम्मानित भएका गुरुङले आफू भ्याट प्रणाली सुरु हुँदा सबैभन्दा बढी खुसी हुने व्यक्ति भएको स्मरण गरे । उनले आफ्नो संस्थाले कर तिरेर बचेको नाफा दान दिन चाहेको र विशेषगरी स्वास्थ्य क्षेत्रमा ठूलो सहयोग गरेको जानकारी दिए । उनका अनुसार, भाटभटेनीले भगवान कोइराला अस्पताल र टिचिङ अस्पताललगायतका स्वास्थ्य संस्थाहरूलाई सहयोग गर्दै आएको छ ।
चुनौतीका पहाडहरू पार गर्दै सफलताको शिखरमा पुगेका मीनबहादुर गुरुङको व्यावसायिक यात्रा दृढ संकल्प र निरन्तर प्रयासको एक अनुपम उदाहरण बनेको छ । व्यक्तिगत र व्यावसायिक जीवनमा आएका अनेकौं संकटलाई अवसरमा बदल्दै उनी आज नेपालको खुद्रा व्यापारमा एक मानकका रूपमा स्थापित भएका छन् ।
