काठमाडौं । नेपाल नागरिक उड्डयन प्राधिकरण (क्यान) र वायु सेवा सञ्चालकहरूबीच हवाई भाडामा महत्त्वपूर्ण सहमति भएको छ । कात्तिक २ गते क्यानका महानिर्देशकको अध्यक्षतामा बसेको बैठकले जेष्ठ नागरिक र फरक क्षमता भएका हवाई यात्रुहरूलाई हवाई टिकटमा विशेष छुट दिने निर्णय गरेको हो । यो निर्णय आजैदेखि लागू भएको छ ।
छुटको व्यवस्था यसप्रकार छ:
-
७० वर्षभन्दा माथिका जेष्ठ नागरिक: सरकारले तोकेको अधिकतम भाडादरमा ५० प्रतिशत छुट।
-
७५ वर्षभन्दा माथिका जेष्ठ नागरिक: सरकारले तोकेको अधिकतम भाडादरमा ७० प्रतिशत छुट।
-
८० वर्षभन्दा माथिका जेष्ठ नागरिक: सरकारले तोकेको अधिकतम भाडादरमा ८० प्रतिशत छुट।
-
फरक क्षमता भएका यात्रु: उमेर समूह जुनसुकै भए पनि न्यूनतम ५० प्रतिशत छुट।
क्यानले यस निर्णयले जेष्ठ नागरिक र फरक क्षमता भएका व्यक्तिहरूलाई हवाई यात्रामा थप सहजता प्रदान गर्ने विश्वास व्यक्त गरेको छ । यो पहलले उनीहरूको यात्रालाई सुलभ बनाउनुका साथै सामाजिक समावेशीकरणमा पनि योगदान पुर्याउने क्यानले बताएको छ ।
