गाडी खरिदमा दोहोरो फाइदा : २० लाखसम्म छुट, ४ वर्षयताकै सस्तो ब्याजदर, (कुन बैंकमा कति)

न्यूज दैनिक

काठमाडौँ । न्यून ब्याजदर र सवारी बिक्रेताबीचको ‘प्राइस वार’ले गर्दा अहिले गाडी खरिदका लागि दुर्लभ अवसर सिर्जना भएको छ । एकातिर बैंकहरूले चार वर्षयताकै सस्तो ब्याजदरमा कर्जा प्रवाह गरिरहेका छन् भने अर्कोतिर राजधानीमा जारी मोबिलिटी एक्स्पोमा कम्पनीहरूले २० लाख रुपैयाँसम्मको आकर्षक छुट उपलब्ध गराएका छन् ।

सवारी साधन बिक्रेताहरूको दुई छुट्टाछुट्टै संगठन बनेसँगै बजारमा बढेको प्रतिस्पर्धाको प्रत्यक्ष फाइदा ग्राहकले पाएका छन् । बुधबारबाट सुरु भएको ‘नाइमा नेपाल मोबिलिटी एक्स्पो २०२५’ मा ५० भन्दा बढी ब्राण्डले नगद छुट, बीमा र अन्य उपहारसहितका अफरहरू सार्वजनिक गरेका छन् ।

चार वर्षयताकै सस्तो कर्जा

ग्राहकका लागि सबैभन्दा ठूलो राहत कर्जाको ब्याजदरमा भएको गिरावट हो । नेपाल राष्ट्र बैंकको तथ्यांकअनुसार, २०७९ माघमा १३.७२ प्रतिशत रहेको सवारी कर्जाको औसत ब्याजदर गत जेठमा घटेर ८.४७ प्रतिशतमा झरेको छ । यो असोज २०७८ (८.३६%) पछिकै सबैभन्दा न्यून हो । कुनै समय १६ प्रतिशतसम्म पुगेको ब्याजदर अहिले केही बैंकहरूले ६.५ प्रतिशतमा झारेका छन्, जसले गाडी खरिदलाई थप सहज बनाएको छ ।