काठमाडौं । गत आर्थिक वर्षमा नेपालका निर्जीवन बीमा कम्पनीहरूले करिब ४५ अर्ब रुपैयाँ बराबरको बीमा शुल्क आर्जन गरेका छन् । नेपाल बीमा प्राधिकरणले सार्वजनिक गरेको तथ्यांकअनुसार, कम्पनीहरूले ३२ लाखभन्दा बढी बीमालेख बिक्री गरी कुल ४४ अर्ब ९१ करोड २६ लाख रुपैयाँको व्यवसाय गरेका हुन् ।
क्षेत्रगत तथ्यांक हेर्दा, निर्जीवन बीमा बजारमा मोटर बीमाले आफ्नो परम्परागत वर्चस्व कायमै राखेको छ । कुल व्यवसायको सबैभन्दा ठूलो हिस्सा, २८.७४ प्रतिशत, ओगट्दै मोटर बीमाबाट मात्रै १२ अर्ब ९० करोड ५८ लाख रुपैयाँभन्दा बढी बीमाशुल्क संकलन भएको छ ।
मोटर बीमालाई सम्पत्ति बीमाले पछ्याएको छ । कुल व्यवसायमा २५.५३ प्रतिशतको उल्लेख्य हिस्सासहित सम्पत्ति बीमाबाट ११ अर्ब ४६ करोड ७२ लाख रुपैयाँभन्दा बढीको कारोबार भएको छ । यी दुई क्षेत्रले मात्रै समग्र निर्जीवन बीमा बजारको ५४ प्रतिशतभन्दा बढी हिस्सा ओगटेका छन्, जसले बजारको प्रवृत्तिलाई स्पष्ट पार्दछ ।
त्यसैगरी, इन्जिनियरिङ तथा ठेक्का व्यवसाय तेस्रो स्थानमा रहेको छ, जसले १७.७७ प्रतिशत बजार हिस्सासहित ७ अर्ब ९८ करोड २५ लाख रुपैयाँको व्यवसाय गरेको छ । विविध बीमाको हिस्सा ११ प्रतिशत रहँदा यसबाट ४ अर्ब ९४ करोड ९ लाख रुपैयाँ संकलन भएको छ ।
अन्य क्षेत्रहरूमा सामुद्रिक बीमाले ५.७१ प्रतिशत, हवाईले ५.२२ प्रतिशत, कृषि तथा बालीले ३.८७ प्रतिशत र लघु बीमाले २.१६ प्रतिशत हिस्सा ओगटेका छन् । प्राधिकरणको तथ्यांकअनुसार यी क्षेत्रहरूबाट क्रमशः २ अर्ब ५६ करोड, २ अर्ब ३४ करोड, १ अर्ब ७३ करोड र ९७ करोड रुपैयाँभन्दा बढीको बीमाशुल्क उठेको छ ।
