काठमाडौं । सिटिजन्स बैंक इन्टरनेशनल लिमिटेडले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार अघिल्लो आर्थिक वर्षको सोही अवधिको तुलनामा बैंकको खुद नाफा २.०८ प्रतिशतले घटेर १ अर्ब २९ करोड ३३ लाख रुपैयाँमा सीमित भएको छ। अघिल्लो वर्षको सोही अवधिमा बैंकले १ अर्ब ३२ करोड रुपैयाँ खुद नाफा आर्जन गरेको थियो।

बैंकका अनुसार समीक्षा अवधिमा खुद ब्याज आम्दानी ११.२० प्रतिशतले र फि तथा कमिशन आम्दानी १९.७४ प्रतिशतले वृद्धि भए पनि खराब कर्जा वृद्धि र इम्पेरमेन्ट चार्ज उच्च हुँदा नाफामा दबाब परेको हो। खराब कर्जा अनुपात ४.१० प्रतिशतबाट बढेर ४.९४ प्रतिशत पुगेको छ। यससँगै इम्पेरमेन्ट चार्ज १ अर्ब ७२ करोड रुपैयाँबाट बढेर २ अर्ब ६७ करोड रुपैयाँ पुगेको छ।

यद्यपि बैंकको कुल सञ्चालन आम्दानी १५.१३ प्रतिशतले बढेर १० अर्ब ५५ करोड रुपैयाँ पुगेको छ, तर सञ्चालन मुनाफा भने २.३२ प्रतिशतले घटेर ३ अर्ब ७६ करोड रुपैयाँमा झरेको छ। नाफामा आएको गिरावटसँगै प्रतिशेयर आम्दानी (EPS) १९ पैसाले घटेर ८ रुपैयाँ ७६ पैसा मात्र भएको छ। असार मसान्तसम्म बैंकको मूल्य–आम्दानी अनुपात (P/E ratio) २६.०६ गुणा र प्रतिशेयर नेटवर्थ १५५ रुपैयाँ ४२ पैसा रहेको छ।

सो अवधिसम्म बैंकले ७७ करोड ५४ लाख रुपैयाँ वितरणयोग्य मुनाफा कमाएको छ, जसअनुसार वितरणयोग्य प्रतिशेयर आम्दानी ५ रुपैयाँ २५ पैसा रहेको छ। बैंकको चुक्ता पूँजी १४ अर्ब ७६ करोड ९० लाख रुपैयाँ रहेको छ भने जगेडा कोषमा ८ अर्ब १८ करोड रुपैयाँ सञ्चित छ।

गत आर्थिक वर्षको अन्त्यमा बैंकले २ खर्ब ११ अर्ब ५० करोड रुपैयाँ निक्षेप संकलन गरी १ खर्ब ६८ अर्ब ९५ करोड रुपैयाँ कर्जा प्रवाह गरेको छ। बैंकका अनुसार चुनौतीपूर्ण आर्थिक परिवेशका बाबजुद वित्तीय स्थायित्व कायम राख्दै आगामी त्रैमासमा नाफा सुधार गर्ने लक्ष्य लिइएको छ।