काठमाडौं । गृह मन्त्रालयले देशको प्रमुख प्रवेशद्वारको व्यवस्थापन गर्ने निकाय, अध्यागमन विभाग र त्रिभुवन अन्तर्राष्ट्रिय विमानस्थलस्थित अध्यागमन कार्यालयको नेतृत्वमा व्यापक फेरबदल गरेको छ । मन्त्रालयले विभागका महानिर्देशक र विमानस्थल कार्यालयका प्रमुख दुवैलाई एकैपटक परिवर्तन गरेको हो ।
मन्त्रालयको निर्णयअनुसार अध्यागमन विभागका महानिर्देशक गोविन्द रिजाललाई गृह मन्त्रालयमा फिर्ता बोलाइएको छ । उनको स्थानमा मन्त्रालयको शान्ति सुरक्षा तथा अपराध नियन्त्रण महाशाखाका प्रमुख, सहसचिव रामचन्द्र तिवारीलाई नयाँ महानिर्देशकको जिम्मेवारी दिइएको छ । तिवारीलाई अध्यागमन क्षेत्रको सुधार र व्यवस्थापनलाई थप चुस्त बनाउने महत्त्वपूर्ण जिम्मेवारीसहित विभागमा पठाइएको हो ।
यसैगरी, त्रिभुवन अन्तर्राष्ट्रिय विमानस्थलस्थित अध्यागमन कार्यालयको प्रमुखको जिम्मेवारी सम्हालेको एक महिना पनि नपुग्दै विष्णुप्रसाद कोइरालालाई पनि गृह मन्त्रालयमा सरुवा गरिएको छ । छोटो समयमै भएको यो सरुवाले अध्यागमन सुधारमा मन्त्रालय गम्भीर रहेको संकेत गरेको छ ।
विमानस्थलको संवेदनशील मानिने अध्यागमन कार्यालयको प्रमुखमा अब खोटाङका प्रमुख जिल्ला अधिकारी (सीडीओ) नरहरि घिमिरेलाई पठाइएको छ । जिल्ला प्रशासनमा काम गरेको अनुभव बटुलेका घिमिरेलाई विमानस्थलको व्यवस्थापनलाई थप सुदृढ बनाउने अपेक्षा गरिएको छ ।
घिमिरेको सरुवासँगै रिक्त भएको खोटाङको प्रमुख जिल्ला अधिकारीको पदमा सहसचिव कल्पना श्रेष्ठलाई पठाइएको गृह मन्त्रालयले जनाएको छ ।
