काठमाडौं । नेपाल बीमा प्राधिकरणले बीमा व्यवसायमा इमानदारिता र व्यावसायिक मर्यादा कायम राख्न बीमकहरूलाई कडा निर्देशन दिएको छ । बजारमा देखिएका अस्वस्थ प्रतिस्पर्धा र विकृतिप्रति शून्य सहनशीलता अपनाइने चेतावनी दिँदै प्राधिकरणका अध्यक्ष शरद ओझाले ऐन, नियम र निर्देशिकाविपरीत जाने যেकोहीलाई कारबाही गरिने स्पष्ट पारेका छन् ।
नेपाल बीमा प्राधिकरणले सोमबार विराटनगरमा आयोजना गरेको कोशी प्रदेशस्थित बीमकका प्रदेश तथा शाखा कार्यालय प्रमुखहरूसँगको अन्तरक्रिया कार्यक्रममा अध्यक्ष ओझाले उक्त निर्देशन दिएका हुन् । उनले बीमा पेशाको गरिमा जोगाउँदै व्यवसायलाई दिगो बनाउन बीमकहरूको भूमिका महत्त्वपूर्ण हुने बताए । “बीमा व्यवसायमा रहेका सकारात्मक पक्षलाई प्रवर्द्धन गर्ने र नकारात्मक प्रवृत्तिलाई निरुत्साहित गर्नुपर्छ,” अध्यक्ष ओझाले भने, “सही रूपमा जोखिमाङ्कन नगरी र बजारमा नकारात्मक सन्देश जानेगरी काम गर्ने छुट कसैलाई छैन ।”
अध्यक्ष ओझाले बीमालेख जारी गर्दा नै बीमितलाई स्पष्ट र सही जानकारी दिन आग्रह गरे ताकि दाबी भुक्तानीका क्रममा विवाद सिर्जना नहोस् । उनले भने, “नागरिकले बीमा गरेपछि दाबी भुक्तानी पाउनैपर्छ । यसका लागि कर्मचारीको क्षमता अभिवृद्धिसँगै उनीहरूमा इमानदारिता हुन अनिवार्य छ ।”
कार्यक्रममा प्राधिकरणका निर्देशक निर्मल अधिकारीले बीमा कम्पनीहरूले अस्वस्थ प्रतिस्पर्धा गर्दै ‘रेट कटिङ’ जस्ता गलत अभ्यास गरेमा प्राधिकरणले कडा कदम चाल्ने बताए । उनले कम्पनीहरूलाई स्वनियममा बसेर अनुशासित रूपमा व्यवसाय गर्न सुझाव दिए ।
बीमकहरूका माग: अधिकार प्रत्यायोजनदेखि पाठ्यक्रममा बीमासम्म
कार्यक्रममा सहभागी प्रदेश तथा शाखा प्रमुखहरूले बीमा व्यवसायलाई प्रदेशस्तरमा प्रभावकारी बनाउन विभिन्न सुझाव प्रस्तुत गरेका थिए । उनीहरूले बीमकका प्रादेशिक कार्यालयहरूलाई थप अधिकार प्रत्यायोजन गर्नुपर्ने, प्रदेशमा सङ्कलन भएको बीमाशुल्कको निश्चित प्रतिशत सोही प्रदेशको संस्थागत सामाजिक उत्तरदायित्वमा खर्च गर्ने व्यवस्था मिलाउनुपर्ने माग राखे ।
यसका साथै, कर्मचारीहरूका लागि नियमित तालिमको व्यवस्था, शाखा कार्यालय स्थापनाका लागि स्पष्ट मापदण्ड र विद्यालय तथा विश्वविद्यालयका पाठ्यक्रममा बीमा विषय समावेश गर्न प्राधिकरणले पहल गर्नुपर्ने जस्ता विषयमा उनीहरूले ध्यानाकर्षण गराएका थिए ।
कार्यक्रममा प्राधिकरणका उपनिर्देशक राजेन्द्र महर्जनले स्वागत मन्तव्य व्यक्त गरेका थिए भने प्राधिकरणको कोशी प्रदेश कार्यालयका प्रमुख विनोद पोखरेलले कार्यक्रम सञ्चालन गरेका थिए । कार्यक्रममा कोशी प्रदेशका विभिन्न बीमा कम्पनीका प्रमुखहरू, इन्स्योरेन्स प्रोफेसनल्स सोसाइटीका पदाधिकारी तथा बीमा मध्यस्थकर्ताहरूको उपस्थिति रहेको थियो ।
