काठमाडौं । प्रतिनिधिसभाको बैठक बस्दैछ । बैठक दिउँसो १ः०० बजे बस्ने गरी बोलाइएको हो ।
आजको बैठकमा उपप्रधानमन्त्री एवं अर्थमन्त्री विष्णुप्रसाद पौडेलले वक्तव्यसहित ‘आर्थिक वर्ष २०८२/८३ को राजस्व र व्ययको वार्षिक अनुमानमाथि सामान्य छलफल गरियोस्’ भन्ने प्रस्ताव पेस गर्ने र सो प्रस्तावमाथि छलफल हुने सम्भावित कार्यसूची छ ।
यस्तै, राज्य व्यवस्था तथा सुशासन समितिका सभापति रामहरि खतिवडाले ‘सङ्घीय निजामती सेवा विधेयकसम्बन्धी समितिको प्रतिवेदन, २०८२’ पेस गर्नुहुने छ ।
संसद्को गाँठो फुक्दै
प्रमुख प्रतिपक्षी दल नेपाल कम्युनिस्ट पार्टी (माओवादी केन्द्र) गृहमन्त्री रमेश लेखकको राजीनामाको मागबाट पछि हटेसँगै लामो समयदेखिको संसद् अवरोध खुल्ने सङ्केत देखिएको छ ।
‘भिजिट भिसा प्रकरण’मा उच्चस्तरीय छानबिन समिति गठन भएमा सदनको गतिरोध अन्त्य गर्न तयार रहेको माओवादीको पछिल्लो निर्णयले राष्ट्रिय राजनीतिमा नयाँ तरंग सिर्जना गरेको छ भने सत्ता समीकरणमा समेत फेरबदल आउन सक्ने अड्कलबाजी सुरु भएको छ ।
‘भिजिट भिसा प्रकरण’मा गृहमन्त्रीको राजीनामा र उच्चस्तरीय छानबिन समितिको माग गर्दै माओवादीसहितका प्रतिपक्षी दलहरूले गत जेठ १३ गतेदेखि निरन्तर संसद् अवरुद्ध गर्दै आएका थिए । तर, पछिल्लो राजनीतिक विकासक्रमसँगै माओवादी आफ्नो प्रमुख मागबाट लचक बन्दै छानबिन समितिको गठनलाई प्रमुख शर्त बनाएको छ ।
माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रतिपक्षी दलहरूको बैठकले भरपर्दो छानबिन समिति गठनमा सहमति जुटे प्रतिनिधिसभाको अवरोध खोल्ने निर्णय गरेको पुष्टि गरे । सदनको गतिरोध अन्त्य गर्ने उद्देश्यले अध्यक्ष प्रचण्ड र प्रमुख सत्तारुढ दल नेपाली कांग्रेसका सभापति शेरबहादुर देउवाबीचको सघन संवादपछि यो सहमति जुटेको हो ।
स्रोतका अनुसार, दुई नेताबीच भएको छलफलमा माओवादीले गृहमन्त्रीको राजीनामाको माग छाड्ने र सरकार उच्चस्तरीय छानबिन समिति गठन गर्न तयार हुने समझदारी बनेको छ । दिउँसो १ बजेका लागि बोलाइएको प्रतिनिधिसभा बैठकअघि नै सहमतिलाई अन्तिम रूप दिने प्रयास भइरहेको छ ।
