काठमाडौँ । राष्ट्रिय प्रजातन्त्र पार्टी (राप्रपा)ले आज बिहान संसदीय दलको आकस्मिक बैठक बोलाएको छ । पछिल्लो राजनीतिक घटनाक्रम र विशेषगरी भिजिट भिसा प्रकरणमा पार्टीको आगामी रणनीति तय गर्न बैठक डाकिएको हो ।
राप्रपाका प्रमुख सचेतक ज्ञानबहादुर शाहीका अनुसार, बैठक बिहान साढे १० बजे सिंहदरबारस्थित संसदीय दलको कार्यालयमा बस्नेछ । बैठकमा समसामयिक राजनीतिक परिस्थितिको समीक्षा गर्दै सदनमा पार्टीले खेल्नुपर्ने भूमिकाबारे गहन छलफल हुने उनले जानकारी दिए ।
आजै प्रतिनिधिसभाको बैठक पनि बस्दैछ, जहाँ विपक्षी दलहरूले भिजिट भिसा प्रकरणलाई प्रमुखताका साथ उठाउँदै गृहमन्त्री रमेश लेखकको राजीनामा माग गर्ने तयारी गरेका छन् । यस्तो अवस्थामा राप्रपाले सदनभित्र कस्तो रणनीति अपनाउने भन्ने विषयमा संसदीय दलको बैठकले ठोस निर्णय लिने अपेक्षा गरिएको छ ।
विपक्षी गठबन्धनले गृहमन्त्री लेखकमाथि भिजिट भिसा दुरुपयोग प्रकरणमा निष्पक्ष छानबिनका लागि मार्गप्रशस्त गर्नुपर्ने दबाब दिइरहेको छ । संसदीय दलको बैठकपछि राप्रपाले भिजिट भिसा प्रकरण र समग्र राजनीतिक अवस्थाबारे आफ्नो औपचारिक धारणा सार्वजनिक गर्ने सम्भावना छ ।
