ग्लोबल आइएमई बैंकको नाफा साढे ४९ प्रतिशत बढ्यो, कमायो तीन अर्ब बढी

काठमाडौं । ग्लोबल आइएमई बैंकको नाफा साढे ४९ प्रतिशत बढेको छ । चालु आर्थिक वर्षको पुस मसान्तसम्म ग्लोबल आइएमई बैंकको नाफा ४९.५१ प्रतिशत बढेको हो ।

बैंकले सार्वजनिक गरेको चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण अनुसार यस अवधिमा बैंकले ३ अर्ब ५ करोड ३४ लाख रुपैयाँ खुद नाफा गरेको छ । गत आवको सोही अवधिमा बैंकले २ अर्ब ४ करोड २३ लाख रुपैयाँ खुद नाफा आर्जन गरेको थियो ।

यस अवधिमा बैंकको वितरणयोग्य मुनाफा २ अर्ब ६४ करोड ५३ लाख रुपैयाँ रहेको छ । प्रतिशेयर आम्दानी १२ रुपैयाँ ४९ पैसा रहेको छ भने प्रतिशेयर नेटवर्थ १६९ रुपैयाँ ५८ पैसा रहेको छ ।

त्यस्तै, बैंकले यस अवधिमा बैंकको खुद ब्याज आम्दानी ८.०९ प्रतिशत घटेको छ । बैंकको जगेडा कोषमा २६ अर्ब ५२ करोड २७ लाख रुपैयाँ सञ्चित रहेको वित्तीय विवरणमा उल्लेख छ ।