चितुवाले १७ दिनमा दुई बालक मार्‍यो, स्थानीय त्रसित

तनहुँ । तनहुँको भानुमा १७ दिनको अवधिमा चितुवाको आक्रमणबाट दुई बालकको मृत्यु भएको छ। चितुवाको आक्रमणबाट चार वर्षीय बालकको मृत्यु भएको १७ दिनपछि शनिबार राती १० वर्षीय अर्का बालकको पनि चितुवाको आक्रमणबाट मृत्यु भएको छ।

भानु नगरपालिका–२ ढल्केवरका १० वर्षीय बालक अमृत गुरुङको चितुवाको आक्रमणबाट मृत्यु भएको हो। चितुवाको आक्रमणबाट घाइते भएका बालकको डुम्रेस्थित लक्ष्मी अस्पतालमा उपचारको क्रममा निधन भएको जिल्ला प्रहरी कार्यालय तनहुँका प्रहरी नायब उपरीक्षक श्यामु अर्यालले जानकारी दिए।

खाना खाएर हात धुन घरको आँगनमा निस्केका गुरुङलाई चितुवाले घिस्याउँदै लगेको हो। चुठ्न बाहिर गएको छोरो नफर्किएपछि बाबु माइला गुरुङले प्रहरीलाई खबर गरेका थिए। प्रहरी र स्थानीयवासीको सहयोगमा खोजतलास गर्दा घरभन्दा केही तल रहेको खोल्सामा अमृतले लगाएको ज्याकेट भेटिएको थियो। उक्त खोल्साभन्दा तल अमृत घाइते अवस्थामा भेटिएका थिए।

उनको घाँटीमा चितुवाको नङग्राले चिथोरेको थियो। चितुवाको आक्रमणबाट बालकको ज्यान गएलगत्तै चितुवालाई नियन्त्रण लिन प्रहरी परिचालन गरिएको छ।