अब संचयकर्तालाई ४२० रुपैयाँमै ११ लाखको स्वास्थ्य बीमा

काठमाडाैं । संचयकर्तालाई अब ४२० रुपैयाँमा ११ लाख बराबराको स्वास्थ्य बीमा सुविधा पाइने भएको छ । कर्मचारी संचय कोषले आउँदो मंसिर १ गतेदेखि संचयकर्ताका लागि उक्त सुविधासहितको स्वास्थ्य बीमा गर्ने भएको हो ।

सामान्य बिरामी प्रतिव्यक्ति १ लाख र जटिल प्रकारको रोग लाग्दा प्रतिव्यक्ति १० लाख गरी कुल ११ लाख रुपैयाँको कभर हुने गरी स्वास्थ्य बीमा गराउन लागिएको कोषले जनाएको छ । कोषले संचयकर्ताको स्वास्थ्य बीमा गर्ने राष्ट्रिय बीमा कम्पनी लिमिटेडबाट गराउन लागेको हो । ११ लाख रुपैयाँको बीमा कभर हुने गरी ४२० रुपैयाँमा स्वास्थ्य बीमा गर्नु निकै सस्तो भएको राष्ट्रिय बीमा कम्पनीको प्रमुख कार्यकारी अधिकृत बीरविक्रम रायमाझीले बताए । उनका अनुसार ४२० रुपैयाँ मध्ये २१० रुपैयाँ पुर्नबीमामा खर्च हुने र बीमा दावी भुक्तानीमा पनि ५०-५० प्रतिशत खर्च बेहोरिने छ ।

संचयकोषमा ६ लाखभन्दा बढी संचयकर्ता छन् । सबै संचयकर्ताको प्रिमियम एकमुष्ट रुपमा कोषले राष्ट्रिय बीमा कम्पनीलाई बुझाउने छ । एकमुष्ट प्रिमियम २५ करोड भन्दा बढी आउँछ । कार्यकारी अधिकृत रायमाझीका अनुसार प्रत्येक दुई वर्षमा बीमा शुल्क परिमार्जन गर्ने सहमति भएको छ । पहिलो वर्ष घाटा नहुने निश्चित भए पनि दोस्रो वर्षमा घाटा नहुने अपेक्षा गरिएको छ । यदि घाटामा गयो भने आवश्यक शुल्क बढाइने पनि रायमाझीले बताए ।

संचयकर्ता बिरामी भएर अस्पताल भर्ना भई उपचार गरेको खण्डमा १ लाख रुपैयाँ र सरकारले जटिल रोग भनि तोकेका ९ प्रकारका रोग लागेमा १० लाख रुपैयाँसम्म बीमा कभर हुनेछ । कोषले ६ लाख संचयकर्ताको स्वास्थ्य बीमा गरिदिने विषयमा सबै प्रक्रिया पूरा गरिसकेको छ । कोषसंग १ अर्ब ६० करोड रुपैयाँको सामाजिक सुरक्षा कोष छ । त्यो कोषले वार्षिक १५ करोड रुपैयाँ कमाउँछ ।