नेपाली यू–१९ महिला फुटबल टोली आज थाइल्याण्ड जाँदै

काठमाडौं । नेपाली यू–१९ महिला फुटबल टोली आज थाइल्याण्ड जाँदैछन् ।
एएफसी यू–१९ महिला च्याम्पियनसिपको छनोट खेल्न टोली सोमबार थाइल्याण्ड जान लागेका हुन् ।
अखिल नेपाल फुटबल संघ (एन्फा) का अनुसार नेपाली टोली अपरान्ह १ बजे थाइल्याण्ड प्रस्थान गर्ने छन् ।
छनोटको समूह बि मा रहेको नेपालले पहिलो खेलमा बलियो प्रतिद्वन्द्वी थाइल्याण्डसँग प्रतिस्पर्धा गर्नेछ । नेपाल र थाइल्याण्डबीचको खेल कात्तिक ७ गते बुधबार चोनबुरी स्टेडियममा हुनेछ । त्यस्तै, कात्तिक ९ गते भारतसँग र कात्तिक ११ गते पाकिस्तानसँग खेल्नेछ ।
समूहको शीर्ष स्थानमा रहने टोलीले दोस्रो चरणमा प्रवेश पाउने छ भने समूहबाट उत्कृष्ट हुने दुई उपविजेताले पनि अघिल्लो चरणमा प्रवेश गर्नेछन् ।