मेस्सीको कप्तानीमा इन्टर मियामीले जित्यो लिग कपको उपाधि

काठमाडौँ । अर्जेन्टिनी स्टार लिओनेल मेस्सीको कप्तानीमा रहेको इन्टर मियामीले एमएलएस लिग कपको उपाधि जितेको छ । आइतबार बिहान सम्पन्न खेलमा इन्टर मियामीले पेनाल्टी सुटआउटमा नाशभिल्ले फुटबल क्लबलाई १०-९ ले पराजित गर्दै लिग कपको उपाधि जितेको हो ।

यसअघि सम्पन्न ९० मिनेटको निर्धारित समयमा दुवै टिमले १-१ गोलको बराबरी गरेका थिए । इन्टर मियामीका लागि लियोनेल मेस्सीसीले खेलको २३औं मिनेटमा गोल गर्दै सुरुवाती अग्रता दिलाएका थिए भने नाशभिल्लेका लागि खेलको ५७औँ मिनेटमा फाफा पिकल्टले गोल गर्दै खेल बराबरी गरेका थिए ।

यस लिग कपमा कुल ७ खेल खेलेका मेस्सीसीले सर्वाधिक १० गोल गरेका छन् । तेस्रो पटक भएको यस लिग कपमा इन्टर मियामीले पहिलो पटक उपाधि जितेको हो । यस अघि २०१९ मा यो उपाधि मेक्सिकन क्लब क्रुज अजुलले जितेको थियो भने २०२१ मा मेक्सिकन क्लब लिओनले जितेको थियो ।