पुरानो रिसिइबीलाई लिएर एक युवकको हत्या

उर्लाबारी । मोरङमा शुक्रबार राति पुरानो रिसिइबीलाई लिएर एक युवकको हत्या भएको छ ।
पथरीशनिश्चरे–८ स्थित शुक्रबारेमा राति १० बजे १७ वर्षीय कृष्णबहादुर विष्टले पुरानो रिसिइबीलाई लिएर सोही ठाउँका २७ वर्षीय विजय खड्काको खुकुरी प्रहार गरी हत्या गरेको प्रहरीले जनाएको छ ।
खुकुरी प्रहारबाट टाउको र शरीरका विभिन्न भागमा चोट लागेका खड्काको घटनास्थलमै मृत्यु भएको र हत्या गर्ने विष्टलाई प्रहरीले खुकुरीसहित राति नै पक्राउ गरेको पथरी इलाका प्रहरी कार्यालयले जनाएको छ ।
मृतकको शव उर्लाबारी–३ स्थित मङ्गलबारे अस्पतालमा परीक्षणका लागि राखिएको छ।