यी हुन् उपत्यकाका २३ ‘ब्ल्याक स्पट’

२०७२, २०७३ र २०७४ मा उपत्यकामा क्रमश ५ हजार ५ सय ६८, ५ हजार ७ सय र ६ हजार ३ सय ८१ दुर्घटना भएका थिए। यो वर्ष असोजसम्म नै ३ हजार ५ सय १३ वटा सवारी दुर्घटना भएका छन्। दुर्घटनामा ज्यान गुमाउनेको संख्या पनि बढ्दो छ। ०७२ मा १ सय ६६ जना, ०७३ मा १ सय ८२ र ०७४ मा १ सय ९४ जनाको मृत्यु भएको थियो। यो वर्ष असोजसम्म ७० जनाले ज्यान गुमाइसकेका छन्। यो खबर आजको अन्नपूर्ण पोष्ट दैनिकमा सभास गोतामेले लेखेका छन्।

महाशाखाका अनुसार ब्ल्याक स्पटमा वैशाखदेखि असोजसम्म १ हजार ६ सय ४ दुर्घटना भएका छन्। भक्तपुरको जगातीमा १ सय १५ वटा, सुकेधारामा १ सय ७०, चाबहिलमा १ सय ५०, एकान्तकुनामा ७०, कोटेश्वरमा ८५, सिनामंगलमा ८६, कलंकीमा १ सय २, कालीमाटीमा ७३, थानकोटमा ९०, महाराजगन्जमा ९२, गोंगबुमा ९६, तीनकुनेमा ७८, जगातीमा ६८, जावलाखेलमा ४७, सातदोबाटोमा ३२, बूढानीलकण्ठमा २९ वटा, बौद्धमा ४७, गौशालामा ९६, सानेपामा ३२ र पुल्चोकमा ४६ सवारी दुर्घटना भएका छन्।

महाशाखाका प्रमुख एसएसपी बसन्त पन्त भन्छन्, ‘अधिकांश दुर्घटना चालककै लापरवाहीबाट भएका छन्। धेरै दुर्घटना हुने स्थानलाई हामीले ब्ल्याक स्पटका रुपमा पहिचान गरेका हौं।’ महाशाखाले ब्ल्याक स्पटमा दुर्घटना जोखिम क्षेत्र भनेर बोर्डसमेत टाँसेको छ। उनका अनुसार समयसमयमा चालकलाई ‘गति घटाउ, आयु बढाउ’ भनेर सचेतना अभिवृद्धि गराइँदै आएको छ।

महाशाखाले दैनिकजसो मादकपदार्थ सेवन गर्ने सवारीचालक, लेन अनुशासन उल्लंघन गर्ने, निषेधित क्षेत्रमा रोक्ने, जेब्राक्रसमाथि सवारी रोक्ने, जथाभावी हर्न बजाउने कसुरमा ९ सय ५९ जना चालकलाई कारवाही गरेको छ। उनले भने, ‘कारवाही गर्र्दैमा दुर्घटना घट्छ भन्ने होइन तर चालकले गल्ती नगर्ने हो भने दुर्घटनामा कमी आउँछ।’