जोभिच लिगको एकै खेलमा ५ गोल गर्ने सबैभन्दा कम उमेरका खेलाडी बने

काठमाडौं । जर्मन बुन्डेसलिगामा आइनट्राक्ट फ्रान्कफर्टले फोर्तुना डसलडर्फलाई हराएको छ ।
शुक्रबार राति भएको खेलमा फ्रान्कफर्टले डसलडर्फलाई ७–१ ले हराएको हो ।
फरवार्ड लुका जोभिच एक्लैले ५ गोल गरेका छन् । खेलको २६ औं मिनेटमा एक्रोब्याटिक प्रहारमार्फत उनले गोलको खाता खोलेका थिए । लगत्तै पहिलो हाफको अन्त्यतिर उनले दोस्रो गोल गरे । दोस्रो हाफको १० मिनेटमा जोभिचले ह्याट्रिक पुरा गरे । खेलको अन्त्यतिर लगातार दुई गोल गर्दै उनले इतिहासमा नाम लेखाए ।
२० वर्ष ३ सय दिनको उमेर रहेका जोभिच लिगको एकै खेलमा ५ गोल गर्ने सबैभन्दा कम उमेरका खेलाडी हुन् ।
लिगमा तेस्रो पटक पहिलो रोजाइमा परेका जोभिचले उत्कृष्ट प्रदर्शन गर्दै क्लबलाई साविक विजेता बायर्न म्युनिखभन्दा माथि छैटौं स्थानमा पुर्याए ।
जर्मन लिगको शीर्ष स्थानमा बोरुसिया डर्टमुन्ड ७ खेलमा १७ अंक बोकेर बलियो पकड बनाउन सफल रहेको छ ।