सरकारले स्थानीय तहमा निर्माणाधीन ६५५ अस्पतालका लागि १० अर्ब रुपैयाँ विनियोजन गरेको छ। ती अस्पतालको निर्माण सम्पन्न आगामी आर्थिक वर्षमा गरिने अर्थमन्त्री जनार्दन शर्माले बताएका छन् ।
अर्थमन्त्री शर्माले पुराना जीर्ण अवस्थामा रहेका अस्पताल भवनको समेत स्तरोन्नती गरिने बताउदै जेष्ठ नागरिकलाई विशिष्टीकृत स्वास्थ्य सेवा प्रदान गर्न २० वटा अस्पतालमा जेष्ठ नागरिक वार्ड सञ्चालनमा ल्याइने जानकारी दिए ।
विदेशीलाई २० युनिट अपार्टमेन्ट बेच्न पाइने
सरकारले निजी क्षेत्रको वर्षौं पुरानो माग पूरा गर्दै विदेशीलाई अपार्टमेन्ट बेच्न पाउने नीति ल्याएको छ। आगामी आर्थिक वर्ष २०७९/८० को बजेट प्रस्तुत गर्दै अर्थमन्त्री जनार्दन शर्माले विदेशी नागरिकलाई विदेशी मुद्रामा अपार्टमेन्ट बेच्न पाइने व्यवस्था मिलाइएको जानकारी दिए ।
आइतबार संघीय संसदमा बजेट प्रस्तुत गर्दै शर्माले १ सयभन्दा बढी युनिटको अपार्टमेन्ट बढीमा २० वटा युनिट विदेशी नागरिकलाई विदेशी मुद्रामा बिक्री गर्न व्यवस्था मिलाइएको जानकारी दिए ।
शर्माले भने, ‘नीजि क्षेत्रलाई १०० भन्दा युनिट रहने अपार्टमेन्टहरूको बढीमा २० प्रतिशत युनिट विदेशी नागरिकलाई विदेशी मुद्रामा बिक्री गर्न अनुमति दिनेगरी कानुनी व्यवस्था गरिनेछ।’
प्रधानमन्त्री रोजगार कार्यक्रमका लागि ७ अर्ब ५ करोड, २ लाखलाई रोजगारी
सरकारले प्रधानमन्त्री रोजगार कार्यक्रमका लागि ७ अर्ब ५ करोड विनियोजन गरेको छ। आइतबार संघीय संसदमा आर्थिक वर्ष २०७९/८० को बजेट प्रस्तुत गर्दै अर्थमन्त्री जनार्दन शर्माले बेरोजगारको तथ्यांक संकलन गरी रोजगारी सिर्जना गरिने बताए।
स्थानीय तहको समन्वयमा बाँझाे खेत पहिचान गरि रोजगार सेवा केन्द्रमा सूचीकृतलाई रोजगारी प्रदान गरिने भन्दै २ लाखलाई रोजगारी दिने घोषणा गरे।
अत्तरिया र सुर्खेतमा जडीबुटी प्रशोधन केन्द्र स्थापना गरिने
सरकारले आगामी आर्थिक वर्षमा सुदुरपश्चिम प्रदेशको अत्तरीया र कर्णाली प्रदेशको सुर्खेतमा जडीबुटी प्रशोधन केन्द्र स्थापना गर्ने भएको छ।
उनले भने, ‘जडिबुटीको विशेषता र उपलब्धताको आधारमा प्रदेशस्तरमा जडीबुटी प्रशोधन उद्योग स्थापना गरिनेछ । सरकारको स्वीकृतिमा सबै किसिमका औषधिजन्य जडीबुटीको खेती गरी प्रशोधन एवं निर्यात गर्न आवश्यक व्यवस्था गरिनेछ।’
प्रतिकृया दिनुहॊस