जीप दुर्घटना हुँदा २ जनाको मृत्यु, १० घाइते

धनगढी । बैतडीबाट डडेल्धुरा जाँदै गरेको जीप दुर्घटना हुँदा दुई जनाको मृत्यु भएको छ । जिल्लाको सिगास गाउँपालिका-३ बाट डडेल्धुरातर्फ आउँदै गरेको से१ज ७३९ नम्बर को जीप लगनबजार नजिकै दुर्घटनामा परेको जिल्ला प्रहरी कार्यालय बैतडीले जनाएको छ ।

दुर्घटनामा परी २ जनाको घटनास्थलमै मुत्यु भएको बैतडीका प्रहरी नायव उपरीक्षक (डीएसपी) रमेशबहादुर पालले बताए । उनका अनुसार ४५ वर्षीय मानसिंह साउँद र ६४ वर्षीय रामसिंह धामीको घटनास्थलमै मृत्यु भएको छ ।

दुर्घटनामा अन्य १० जना घाइते भएका छन् । दुर्घटनास्थलबाट डडेल्धुरा नजिक पर्ने भएकाले घाइतेहरुलाई डडेल्धुरा अस्पतलामा लगिएको डीएसपी पालले जानकारी दिए । उनका अनुसार प्रहरी चौकी ठाँटा र प्रहरी चौकी खोडपेबाट खटिएको प्रहरीको टोली घटनास्थल पुगेर घाइतेहरुको उद्दार गरिएको हो ।