नेपाल बैक ८३औं वर्षमा, देशकै मानक बैंक बनाउने प्रतिवद्धता

काठमाडौं । मुलुकको अग्रणी बैंक नेपाल बैंक लिमिटेड सेवाको ८३औं वर्षमा प्रवेश गरेको छ । वार्षिकोत्सवको अवसरमा आयोजित कार्यक्रममा अर्थमन्त्री डा. युवराज खतिवडाले मुलुकको गौरवपूर्ण इतिहास भएको नेपाल बैंकले आफना विगतका कमजोरीहरु दोहरिन नदिई निक्षेप कर्जा लगायत अन्य कारोवारमा गुणात्मक वृद्धि मार्फत आफनो श्रेष्ठता देखाउनु पर्ने वताए ।

यसै अवसरमा बैंकले सार्वजनिक उत्तरदायित्व कार्यक्रम अन्तर्गत मानव कल्याण समाज भक्तपुरलाई तीन लाख आर्थिक सहयोग प्रदान गरेको छ । उक्त राशीको चेक बैंकको प्रदेश नम्बर ३ प्रादेशिक कार्यालयका प्रमुख सुन्दर पन्थीले समाजका संचालक सुमित्रा चौलागाईलाई एक समारोहका बीच हस्तान्तर गरे ।

यसै अवसरमा बैंकद्वारा आयोजित ज्ञान तथा अनुभव विनिमयको ११औं श्रृंखलामा वरिष्ठ अर्थविद् एवं राष्ट्रिय योजना आयोगका पूर्व उपाध्यक्ष डा. स्वर्णिम वाग्लेसँग वार्ता पनि भएको थियो । यसैगरि बैंकले आयोजना गरेको निशुल्क स्वास्थ्य शिविरमा ३७९ जनाको स्वास्थ्य परीक्षण भयो भने रक्तदान कार्यक्रममा ९१ रक्तदाताले रक्तदान गरेका थिए ।

वार्षिकोत्सवकै अवसरमा कार्तिक ३० गते अर्थमन्त्री खतिवडाले देशका विभिन्न स्थानमा एकसाथ स्थापना गरिएका बैंकका १८ बटा शाखा, २ वटा काउण्टर समेत २० स्थानका सेवा विन्दुको डिजिटल माध्यमबाट उद्घाटन गरे ।