आफ्नै देशको खुफिया एजेन्सीप्रति अमेरिकी राष्ट्रपति ट्रम्पको आक्रोश

काठमाडौं । अमेरिकी राष्ट्रपति डोनाल्ड ट्रम्पले आफ्नै देशको खुफिया एजेन्सीलाई इरान मामिलामा अनुभवहिन भएको आरोप लगाएका छन् ।

उनले उत्तर कोरियालाई लिएर गरिएको आँकलनलाई पनि खारेज गरेका छन् ।

राष्ट्रपति ट्रम्पले एक ट्वीट गर्दै इरानसँग सावधान रहनु पर्ने र खुफिया अधिकारीहरु फेरी पनि स्कुल जानुपर्ने भन्दै असन्तुष्टि जनाएका छन् ।

अमेरिकी खुफिया अधिकारीहरुले विश्वव्यापी सुरक्षा खतरालाई लिएर गरेको आँकलनमा इरानले परमाणु हतियार बनाउन छोडेको उल्लेख गरेका थिए ।

राष्ट्रपति ट्रम्पले यही निचोडमा आफ्नो प्रतिक्रिया दिएका हुन् ।

राष्ट्रपति ट्रम्पले आफ्नो ट्वीटमामा इरानको रणनीतिमा अमेरिकी खुफिया अधिकारी अन्जान र गलत भएको उल्लेख गरे । उनले इरान अहिले पनि संभावित खतरा र संघर्षको स्रोत बनेको आरोप लगाएका छन् ।

खुफिया अधिकारीहरुले उत्तर कोरियाले आफ्नो परमाणु कार्यक्रमलाई छोड्ने संभावना नरहेको बताएका थिए ।

नेस्नल इंटिलिजेन्सका निर्देशक ड्न कोट्स र अन्य खुफिया प्रमुखहरुले गत मंगलबार सिनेटसमक्ष विश्वव्यापी खतरा आँकनलसम्बन्धी रिपोर्ट प्रस्तुत गरेका थिए ।

गतबर्ष राष्ट्रपति ट्रम्पले सन् २०१५ मा अमेरिकाले इरानसँग गरेको ऐतिहासिक परमाणु सम्झौताबाट बाहिरिने घोषणा गरेका थिए ।

यो कदमको अमेरिकाभित्रै मात्र नभएर पुरै विश्वले आलोचना गरेको थियो ।

गत बर्ष नै ट्रम्पले उत्तर कोरियासँग राजनीतिक सम्बन्ध सुधार गर्नेमा ठोस कदम उठाउँदै उत्तर कोरियाली नेता किम जोङ् उनसँग भेटवार्ता गरेका थिए । (एजेन्सी)