बाराका सुरक्षा अधिकारी चढेको जीप दुर्घटना, सशस्त्रका एसपीको मृत्यु, सीडीओ गम्भीर

सिमरा । बाराका सुरक्षा अधिकारी चढेको स्कार्पियो जिप शनिबार साँझ दुर्घटना हुँदा सशस्त्र प्रहरीका एसपीको मृत्यु भएको छ । सशस्त्र प्रहरी बल १२ नम्बर गण बारामा कार्यरत सशस्त्र प्रहरी उपरीक्षक बलराम पोखरेलको मृत्यु भएको हो ।

दुर्घटनामा बाराका प्रमुख जिल्ला अधिकारी गणेश भट्टराईसहित अन्य ३ जना घाइते भएका छन् । दुर्घटनामा सशस्त्र प्रहरी हवल्दार सञ्जयकुमार यादव, प्रहरी हवल्दार शम्भु गुरुङ र चालक जगत पटेल घाइते भएको प्रहरी स्रोतले जनाएको छ । घाइतेमध्ये प्रमुख जिल्ला अधिकारी भट्टराईको अवस्था गम्भीर छ ।

कर्मचारी मिलन केन्द्र बाराले निजगढस्थित शहिद हिरालाल पार्कमा आयोजना गरेको पिकनीकबाट फर्किएको जिप पथलैया–निजगढ सडक खण्डको पसाहा पुल नजिक दुर्घटना भएको हो ।

बाराका प्रमुख जिल्ला अधिकारीले चढ्ने गरेको ना १ झ १६३३ नम्बरको स्कार्पियो जीप सडकमा रोकी राखेको ट्रयाक्टरको टेलरसँग ठोक्किएको सशस्त्र प्रहरी बल बाराले जनाएको छ ।दुर्घटनामा ज्यान गुमाएका एसपी पोखरेलको शव अल्पाईन अस्पताल सिमरामा राखिएको छ । दुर्घटनापछि उपचारका लागि अल्पाईन अस्पताल पु¥याइएका एसपी पोखरेललाई चिकित्सकले मृत घोषित गरेका थिए ।