सर्लाहीमा रोकिराखेको बसमा ट्रक ठोक्कियो, घटनास्थलमै तीनको मृत्यु, तीन घाइते

काठमाडाैँ । पूर्वपश्चिम राजमार्गअन्तर्गत ईश्वरपुर खण्डमा शनिबार बिहान रोकिराखेको रात्रि बसलाई ट्रकले ठक्कर दिँदा तीन यात्रुको मृत्यु भएको छ। काठमाडौंबाट इलामका लागि जाँदै गरेको ना ४ ख ९७५४ नम्बरको बसलाई बिहान २ बजे ना ५ ख ७१२९ नम्बरको ट्रकले पछाडिबाट ठक्कर दिएको हो।

प्रहरीका अनुसार दुर्घटनामा इलाम सुल्बुङ-७ का २७ वर्षीय गोविन्द साउदेन, सुनसरी इटहरी उपमहानगरपालिका-१६ का ३० वर्षीया विनिता राई र पर्साको वीरगंज उपमहानगरपालिका-१९ का ३५ वर्षीय रहिम मियाँको मृत्यु भएको हो। साउदेन र राई बसका यात्रु हुन् भने मियाँ ट्रकका यात्रु हुन्।

दुर्घटनामा परी बसका यात्रु नुवाकोट विदुर नगरपालिका–१३ का २७ वर्षीय दावा तामाङ, झापाको अर्जुनधारा–६ का ३५ वर्षीय राजेन्द्र खतिवडा र उदयपुर कटारी–१ का २२ वर्षीय दीपक अधिकारी घाइते भएका छन्।

तामाङको उपचार ललितपुरकाे बी एन्ड बी अस्पताल, खतिवडाको बिर्तामोड र अधिकारीको लालबन्दीमा उपचार भइरहेको प्रहरीले जनाएको छ। मृतकका शव सदरमुकाम मलंगवास्थित जिल्ला अस्पतालमा राखिएको प्रहरीले जानकारी दिएकाे छ।