काठमाडौं । जेनजीका प्रतिनिधि सुदन गुरुङले आफ्ना मागहरू पूरा नभएसम्म निर्वाचन हुन नदिने कडा चेतावनी दिएका छन् । बिहीबार बिहान लैनचौरस्थित नेपाल स्काउटको जग्गामा खड्का ल्याण्ड प्रा.लि.ले सञ्चालन गर्दै आइरहेका संरचना हटाउने क्रममा त्यहाँ पुगेका उनले गृहमन्त्री ओमप्रकाश अर्याललाई यसको सम्पूर्ण जिम्मेवारी लिनुपर्ने चेतावनी दिएका हुन् ।
गुरुङले आफूहरूका माग पूरा नभए अर्को सशक्त आन्दोलन चर्काउने र त्यसको सम्पूर्ण जिम्मा गृहमन्त्री अर्यालले लिनुपर्ने बताए । उनले गृहमन्त्री अर्यालले जेनजीका हरेक वार्तामा संलग्न भई मागहरू पूरा गर्ने विश्वास दिलाएको तर हालसम्म त्यसअनुसार काम नभएकोमा आक्रोश पोखे ।
गुरुङले आफ्ना मागहरू पूरा नगरी गृहमन्त्री निर्वाचनको रटानमा लागेको भन्दै यो धोका भएको टिप्पणी गरे । यदि माग पूरा नभए गृहमन्त्री अर्याललाई निर्वाचन महँगो पर्ने उनको भनाइ छ ।
