काठमाडौं । नेपाली कांग्रेसका सभापति तथा पूर्वप्रधानमन्त्री शेरबहादुर देउवा र उनकी पत्नी आरजु राणा देउवा गएराति स्वास्थ्य उपचारका लागि सिंगापुर प्रस्थान गरेका छन् । काठमाडौंस्थित त्रिभुवन अन्तर्राष्ट्रिय विमानस्थलबाट सिंगापुर एयरलाइन्सको विमानमार्फत उडेका देउवा दम्पती आज बिहान सिंगापुरको चाङ्गी अन्तर्राष्ट्रिय विमानस्थलमा ओर्लिएका हुन् ।
विमानस्थलबाट बाहिरिने क्रममा देउवा दम्पती ह्विलचेयरमा देखिएकाले उनीहरूको स्वास्थ्य अवस्थालाई लिएर विभिन्न अड्कलबाजी सुरु भएका छन् । सभापति देउवाका स्वकीय सचिव भानु देउवाका अनुसार, यो नियमित स्वास्थ्य परीक्षण र उपचारको लागि तय भएको भ्रमण हो ।
स्मरण रहोस्, गत भदौ २४ गते बूढानीलकण्ठस्थित देउवा निवासमा भएको ुजेनजी आन्दोलनु का क्रममा देउवा दम्पतीमाथि कुटपिट भएको र निवासमा आगजनीसमेत भएको थियो । उक्त घटनापछि देउवा दम्पती लामो समयसम्म सार्वजनिक भएका थिएनन् । गत असोज २८ गते पार्टी कार्यालय सानेपामा बसेको केन्द्रीय समिति बैठकमा उनीहरू सार्वजनिक भएका थिए ।
सिंगापुर प्रस्थान गर्नुअघि सभापति देउवाले पार्टीको कार्यवाहक सभापतिको जिम्मेवारी उपसभापति पूर्णबहादुर खड्कालाई हस्तान्तरण गरेका छन् ।
यसअघि, पनि देउवा विभिन्न स्वास्थ्य समस्याका कारण उपचारका लागि विदेश जाने गरेका थिए । यसपटकको सिंगापुर भ्रमणलाई उनीहरूको हालैको स्वास्थ्य समस्यासँग जोडेर हेरिएको छ ।
