काठमाडौँ । नेपाल लेयर्स कुखुरापालक संघले मंगलबारदेखि लागू हुने गरी अन्डाको मूल्यमा पुनः वृद्धि गरेको छ। प्रतिक्रेट ५० रुपैयाँले बढाइएको यस मूल्यवृद्धिसँगै ठूलो अन्डाको मूल्य ५०० रुपैयाँ र मध्यम अन्डाको मूल्य ४५० रुपैयाँ पुगेको छ। चितवनलाई मूल्य निर्धारणको आधार मानेर तोकिएको यस नयाँ दरले बजारमा प्रतिगोटा अन्डाको मूल्य करिब २२ रुपैयाँ पुग्ने अनुमान गरिएको छ।
संघले कुखुराको दाना, औषधि र समग्र उत्पादन लागतमा भएको वृद्धिलाई मूल्य समायोजनको मुख्य कारण बताएको छ। किसानको उत्पादन लागत र बजार मूल्यबीच सन्तुलन कायम गर्न यो निर्णय आवश्यक भएको संघको दाबी छ।
यसअघि पनि छोटो अवधिमै अन्डाको मूल्य बढेको थियो। यस पटकको वृद्धिले उपभोक्ताको दैनिक खर्चमा थप बोझ पर्ने निश्चित छ। चाडपर्व नजिकिँदै गर्दा भएको यो मूल्यवृद्धिले सर्वसाधारणको भान्सामा प्रत्यक्ष असर पार्ने देखिन्छ। एकातिर व्यवसायीहरू उत्पादन लागत धान्न मूल्यवृद्धि आवश्यक भएको बताउँछन् भने अर्कोतिर उपभोक्ताहरू यसबाट मारमा परेका छन्।
यस विषयमा सरकार र सम्बन्धित निकायले ध्यान दिनुपर्ने माग उपभोक्ताको रहेको छ।
