काठमाडौँ । नेपाली कांग्रेसको पदाधिकारी बैठक उपसभापति पूर्णबहादुर खड्काको अध्यक्षतामा पार्टी केन्द्रीय कार्यालय सानेपामा सुरु भएको छ । आज दिउँसो १ बजेका लागि तय गरिएको बैठक निर्धारित समयभन्दा आधा घण्टा ढिलो गरी प्रारम्भ भएको हो ।

सहमहामन्त्री महालक्ष्मी उपाध्याय डिनाका अनुसार बैठकमा पार्टीका पदाधिकारी र पूर्वपदाधिकारीहरूको सहभागिता रहेको छ । यस बैठकको प्रमुख एजेन्डा आगामी असोज २६ गतेका लागि निर्धारित केन्द्रीय कार्यसमिति बैठकका एजेन्डाहरू तय गर्नु रहेको बताइएको छ ।

पार्टी सभापति शेरबहादुर देउवा बैठकमा अनुपस्थित रहेका छन् । गत भदौ २४ गते जनमुखी आन्दोलनका क्रममा बुढानीलकण्ठस्थित उनको निवासबाट बाहिर निकालेर कुटपिट गरिएपछि देउवालाई गहिरो चोट लागेको थियो । उक्त घटनामा उनको गर्दनमा १२ वटा टाँका लगाइएको र घाउ अझै पूर्ण रूपले निको भइनसकेकाले उनी आजको बैठकमा उपस्थित हुन नसकेको जानकारी दिइएको छ ।

देउवाको स्वास्थ्यलाभको कामना गर्दै पदाधिकारीहरूले केन्द्रीय कार्यसमितिका लागि महत्वपूर्ण निर्णयहरूमाथि छलफल गर्ने अपेक्षा गरिएको छ ।