काठमाडौं । लामो समयदेखि प्रतीक्षा गरिएको बुङ्गल हाइड्रो लिमिटेडको प्रारम्भिक सार्वजनिक निष्काशन (आईपीओ) बिहीबार सफलतापूर्वक बाँडफाँट भएको छ। कम्पनीको सेयर निष्काशन तथा बिक्री प्रबन्धक हिमालयन क्यापिटलको कार्यालयमा एक समारोहका बीच गोलाप्रथाबाट आईपीओ बाँडफाँट गरिएको हो।

कम्पनीले गत भदौ १६ गतेदेखि १९ गतेसम्म सर्वसाधारणका लागि १७ करोड १ लाख ५० हजार रुपैयाँ बराबरको १७ लाख १ हजार ५०० कित्ता साधारण सेयर निष्काशन गरेको थियो। यो आईपीओमा लगानीकर्ताहरूको उल्लेख्य सहभागिता देखिएको थियो।

प्राप्त जानकारी अनुसार, यस आईपीओमा कुल २१ लाख ७५ हजार ८८८ जना आवेदकले करिब २ करोड ३७ लाख ३८ हजार ९१० कित्ता सेयरका लागि आवेदन दिएका थिए। ती मध्ये ३२ हजार ६३८ आवेदन विभिन्न कारणले रद्द भएका छन् भने २१ लाख ४३ हजार २५० आवेदन स्वीकृत भएका छन्।

मागभन्दा बढी आवेदन परेका कारण धितोपत्र निष्काशन नियमावली अनुसार गोलाप्रथा प्रक्रियामार्फत सेयर बाँडफाँट गरिएको हो। यस प्रक्रियाबाट १ लाख ७० हजार १५० जना भाग्यशाली आवेदकहरूले १० कित्ताका दरले सेयर प्राप्त गर्न सफल भएका छन्।

बुङ्गल हाइड्रोको आईपीओको नतिजा आवेदकहरूले विभिन्न माध्यमबाट सजिलै हेर्न सक्नेछन्। नतिजा हेर्नका लागि हिमालयन क्यापिटल लिमिटेडको आधिकारिक वेबसाइट, सीडीएससीको आईपीओ रिजल्ट पोर्टल (iporesult.cdsc.com.np), वा आफ्नो मेरो सेयर एकाउन्ट प्रयोग गर्न सकिने व्यवस्था गरिएको छ। आवेदकहरूले आफ्नो डीपी आइडी र अन्य आवश्यक विवरणहरू प्रविष्ट गरी नतिजा हेर्न सक्नेछन्।