काठमाडौं । एनआईसी एशिया बैंकका ग्राहकलाई नगरकोटस्थित माउन्टेन भिस्टा रिट्रिटमा विशेष छुट सुविधा उपलब्ध हुने भएको छ। बैंक र होटलबीच भएको समझदारीअनुसार अब बैंकका ग्राहकले होटलमा सेवा लिँदा १० प्रतिशत छुट पाउने भएका छन्।
सम्झौता अनुसार, ग्राहकले होटलमा उपलब्ध कुनै पनि सेवा उपयोग गर्दा सो छुट प्राप्त गर्न सक्नेछन्। छुट लिनका लागि एनआईसी एशिया बैंकका ग्राहकले डेबिट कार्ड, क्रेडिट कार्ड वा प्रिपेड कार्डमार्फत भुक्तानी गर्नुपर्नेछ। साथै, मोबैंक एपमार्फत डिजिटल भुक्तानी गरेमा पनि छुटको सुविधा लागू हुने बैंकले जनाएको छ।
बैंकले यस सहकार्यलाई ग्राहकलाई अतिरिक्त सुविधा प्रदान गर्ने मात्र नभई, देशमा नगदरहित कारोबार प्रवर्द्धन गर्ने महत्वपूर्ण कदमका रूपमा लिएको छ। डिजिटल भुक्तानी प्रयोग गर्ने संस्कृतिलाई अझ मजबुत बनाउन यस्तो सहकार्यले सहयोग गर्ने विश्वास बैंकले व्यक्त गरेको छ।
नगरकोट पर्यटनको आकर्षक गन्तव्य मानिँदै आएको छ। यस्तोमा होटल सेवामा छुटले बैंकका ग्राहकलाई थप सहज र फाइदाजनक अनुभव दिलाउने अपेक्षा गरिएको छ। साथै, यसले डिजिटल वित्तीय सेवाको उपयोगलाई अझ व्यापक बनाउन टेवा पुग्ने बैंकको विश्वास छ।
यसअघि पनि एनआईसी एशिया बैंकले विभिन्न होटल, रेष्टुरेन्ट तथा सेवाप्रदायक संस्थासँग सहकार्य गर्दै ग्राहकलाई छुट सुविधा उपलब्ध गराउँदै आएको छ। नयाँ सहकार्यसँगै ग्राहकलाई सुविधा विस्तार हुने र डिजिटल भुक्तानी प्रवर्द्धनमा योगदान पुग्ने बताइएको छ।
