काठमाडौं । डडेल्धुराको नवदुर्गा गाउँपालिका-५ स्थित चौडको कच्ची सडक खण्डमा बिहीबार बिहान भएको जिप दुर्घटनामा चार जनाको घटनास्थलमै मृत्यु भएको छ । से १ ज ७३८ नम्बरको जिप सडकबाट करिब पाँच सय मिटर तल जंगलमा खसेको जिल्ला प्रहरी कार्यालय डडेल्धुराले जनाएको छ ।

जिल्ला प्रहरी कार्यालय डडेल्धुराका निमित्त प्रमुख प्रहरी निरीक्षक डम्बर विष्टका अनुसार ठाडा बजारबाट डडेल्धुरा सदरमुकामतर्फ आइरहेको उक्त जिप करिब सवा नौ बजेतिर दुर्घटनामा परेको अनुमान गरिएको छ । दुर्घटनास्थलमा पुगेको प्रहरी टोलीले अहिलेसम्म चार जनाको शव फेला पारेको र मृतकहरूको सनाखत हुन बाँकी रहेको प्रहरी निरीक्षक विष्टले जानकारी दिए । दुर्घटनाको कारण अझै खुल्न सकेको छैन ।

प्रहरीका अनुसार दुर्घटनामा कम्तीमा चार जना घाइते भएको भनिए पनि यकिन संख्या प्राप्त भइसकेको छैन । घाइतेहरूको उद्धार कार्य तीव्र रूपमा भइरहेको छ र उनीहरूलाई थप उपचारका लागि डडेल्धुरा अस्पताल पठाइएको छ ।

घटनास्थलको प्रकृति हेर्दा दुर्घटना भयानक रहेको र जिप पूर्ण रूपमा क्षतिग्रस्त भएको देखिन्छ । कच्ची सडक र भौगोलिक विकटताका कारण उद्धार कार्यमा केही कठिनाइ भइरहेको प्रहरीले जनाएको छ । घटनाबारे थप अनुसन्धान भइरहेको र विस्तृत विवरण आउन बाँकी रहेको प्रहरीले बताएको छ ।