काठमाडौं । नेपाली कांग्रेसका सभापति शेरबहादुर देउवाले पार्टीका पदाधिकारीहरूको आकस्मिक बैठक बोलाएका छन् । संसदीय समितिको सभापति चयन र उपसभामुख इन्दिरा रानामगरविरुद्ध चलिरहेको हस्ताक्षर अभियानका विषयमा पार्टीभित्रै मतभेद चुलिएपछि निर्णायक छलफलका लागि सोमबार बिहान १० बजे बुढानीलकण्ठस्थित आफ्नै निवासमा बैठक डाकिएको हो ।

बैठकको मुख्य एजेन्डामध्ये राज्य व्यवस्था तथा सुशासन समितिको सभापति चयन पहिलो प्राथमिकतामा छ । संघीय निजामती सेवा विधेयकमा ‘कुलिङ पिरियड’ सम्बन्धी प्रावधानमा भएको गडबडीको नैतिक जिम्मेवारी लिँदै सभापति रामहरि खतिवडाले गत साउन २८ गते पदबाट राजीनामा दिएपछि उक्त पद रिक्त छ । प्रतिनिधिसभा नियमावली अनुसार, पद रिक्त भएको १५ दिनभित्र निर्वाचन गरिसक्नुपर्ने बाध्यात्मक व्यवस्थाका कारण कांग्रेसलाई तत्काल उम्मेदवार टुंगो लगाउनुपर्ने दबाब छ ।

त्यसैगरी, बैठकको अर्को महत्त्वपूर्ण एजेन्डा उपसभामुख इन्दिरा रानामगरलाई पदबाट हटाउन पार्टी र एमालेका केही सांसदहरूले अघि बढाएको हस्ताक्षर अभियान हो । उपसभामुखले पदीय आचरणविपरीत काम गरेको आरोप लगाउँदै अभियान चलाइए पनि यसले पार्टीभित्रै गम्भीर विवाद सिर्जना गरेको छ ।

पार्टीको इतर समूहका नेता डा. शेखर कोइराला तथा महामन्त्रीद्वय गगन थापा र विश्वप्रकाश शर्माले सार्वजनिक रूपमै यस कदमको विरोध गरेका छन् । संस्थापन इतर पक्षको असन्तुष्टिपछि सभापति देउवा यस विषयमा साझा धारणा बनाउन दबाबमा परेका हुन् । पदाधिकारी बैठकले यी दुवै विषयमा पार्टीको आधिकारिक लाइन तय गर्ने अपेक्षा गरिएको छ, जसले आगामी दिनमा कांग्रेसको संसदीय रणनीतिको दिशा निर्धारण गर्नेछ ।