काठमाडौँ । शिखर इन्स्योरेन्स लिमिटेडले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ, जसले कम्पनीको नाफामा सामान्य सुधार भए पनि लगानीकर्ताको प्रतिफलमा संकुचन आएको देखाएको छ । बीमा व्यवसाय विस्तारमा कम्पनीले उल्लेख्य सफलता पाए पनि बढ्दो दाबी भुक्तानी र खर्चका कारण मुनाफामा अपेक्षित वृद्धि हुन नसकेको हो ।

विवरणअनुसार, समीक्षा अवधिमा कम्पनीले ४५ करोड २७ लाख रुपैयाँ खुद नाफा आर्जन गरेको छ । यो नाफा अघिल्लो आर्थिक वर्षको सोही अवधिको ४४ करोड ५३ लाख रुपैयाँको तुलनामा १.६६ प्रतिशतले मात्र बढी हो ।

कम्पनीको व्यावसायिक विस्तार भने उत्साहजनक देखिएको छ । समीक्षा अवधिमा खुद आर्जित बीमाशुल्क ३१.९१ प्रतिशतले बढेको छ । बीमाशुल्क सँगसँगै कम्पनीको कुल आम्दानी पनि ११.७५ प्रतिशतले वृद्धि भएको वित्तीय विवरणमा उल्लेख छ ।

यद्यपि, आम्दानीमा भएको वृद्धिलाई बढ्दो दाबी भुक्तानी र खर्चले ओझेलमा पारेको छ । यस अवधिमा कम्पनीको खुद दाबी भुक्तानी २१.९५ प्रतिशतले बढेको छ भने कुल खर्च १४.७२ प्रतिशतले वृद्धि भएको छ । बीमा व्यवसाय विस्तारसँगै दाबी भुक्तानी बढ्नु स्वाभाविक भए पनि यसको प्रत्यक्ष असर कम्पनीको नाफामा देखिएको छ ।

नाफामा सामान्य सुधार भए पनि कम्पनीको प्रतिशेयर आम्दानी (ईपीएस) भने घटेको छ । समीक्षा अवधिमा ईपीएस १ रुपैयाँ २९ पैसाले घटेर १५ रुपैयाँ ४९ पैसामा सीमित भएको छ । यसले नाफाको वृद्धिदरले कम्पनीको शेयर पुँजीको आकारलाई उछिन्न नसकेको संकेत गर्दछ । गत असार मसान्तसम्म कम्पनीको मूल्य–आम्दानी अनुपात ४९.९५ गुणा र प्रतिकित्ता खुद मूल्य १९८ रुपैयाँ ९७ पैसा रहेको छ ।

हाल २ अर्ब ९२ करोड रुपैयाँ चुक्ता पुँजी भएको शिखर इन्स्योरेन्सको जगेडा कोष भने बलियो देखिन्छ । कम्पनीको विशेष जगेडा कोषमा १ अर्ब ९१ करोड रुपैयाँ, महाविपत्ति कोषमा १६ करोड ७ लाख रुपैयाँ, र रिटेन्ड अर्निङ्समा २१ करोड १७ लाख रुपैयाँ सञ्चित छ । समग्रमा, बीमाशुल्क संकलनमा आक्रामक देखिए पनि बढ्दो लागत र दाबी भुक्तानीका कारण कम्पनीको मुनाफा र प्रतिशेयर आम्दानीमा दबाब परेको वित्तीय विवरणले स्पष्ट पारेको छ ।