काठमाडौं । लामो समयदेखि निरन्तर नोक्सानीमा रहेको समृद्धि फाइनान्स लिमिटेडले अन्ततः नाफाको मुख देखेको छ । आर्थिक वर्ष २०८१/८२ को चौथो त्रैमासिक वित्तीय विवरण सार्वजनिक गर्दै कम्पनीले ३ करोड १९ लाख रुपैयाँ खुद नाफा कमाएको घोषणा गरेको हो, जसले संस्थाको भविष्यप्रति सुधारको एक बलियो आशा जगाएको छ ।

वित्तीय स्वास्थ्यका मुख्य सूचकहरूमा देखिएको सकारात्मक परिवर्तनले यो आशालाई थप बलियो बनाएको छ । यस अवधिमा संस्थाको निक्षेप संकलनमा १३.७२ प्रतिशत र कर्जा लगानीमा ९.६२ प्रतिशतले वृद्धि भएको छ । कुनै समय संस्थाको लागि सबैभन्दा ठूलो चुनौतीको रूपमा रहेको निष्कृय कर्जाको अनुपातमा आएको नाटकीय गिरावट सबैभन्दा उल्लेखनीय सफलता हो । अघिल्लो वर्षको सोही अवधिमा १९.९३ प्रतिशत रहेको निष्कृय कर्जा अनुपातलाई एकल अंकमा झार्दै ९.६६ प्रतिशतमा सीमित गर्न संस्था सफल भएको छ । यो सुधारसँगै कम्पनीको प्रतिसेयर आम्दानी पनि ३ रुपैयाँ ९० पैसा पुगेको छ ।

सानो व्यावसायिक आकारका कारण सञ्चालन नोक्सानी र उच्च निष्कृय कर्जाको मार खेप्दै आएको संस्थाले क्रमिक रूपमा व्यवसाय विस्तार गर्दै मुनाफामा जाने दृढ अठोट लिएको देखिन्छ । यही रणनीतिक योजनाअन्तर्गत समृद्धि फाइनान्सले पोखरा फाइनान्स लिमिटेडसँग मर्जर सम्झौतामा समेत हस्ताक्षर गरिसकेको छ ।

यो मर्जरले संस्थालाई अझ दरिलो, विश्वसनीय एवं सुदृढ बनाउने र भविष्यमा सेयरधनीहरूलाई उच्चतम लाभांश प्रदान गर्ने बलियो आधार तयार पार्ने विश्वास कम्पनीले लिएको छ । वित्तीय संकटबाट गुज्रिरहेको संस्थाले एकातर्फ आफ्नो आन्तरिक वित्तीय अवस्थामा सुधार ल्याउनु र अर्कोतर्फ एक सफल मर्जरमार्फत आफ्नो भविष्य सुरक्षित गर्ने प्रयास गर्नुलाई वित्तीय बजारमा एक सकारात्मक कदमको रूपमा हेरिएको छ ।