काठमाडौं । साताको पहिलो कारोबार दिन शेयर बजारमा लगानीकर्ताले एक अनौठो तर उत्साहजनक परिदृश्यको सामना गरेका छन् । नेपाल स्टक एक्सचेञ्ज (नेप्से) परिसूचक दोहोरो अङ्कले घटेर करेक्सनको सङ्केत गरे पनि कारोबार रकमले भने नयाँ कीर्तिमान कायम गरेको छ । पछिल्लो करिब ११ महिनाकै उच्च कारोबार हुँदै बजारमा साढे २६ अर्बभन्दा बढीको शेयर खरिदबिक्री भएको छ, जसले बजारमा लगानीकर्ताको उत्साहजनक सहभागितालाई पुष्टि गरेको छ ।

आइतबार नेप्से परिसूचक १८ दशमलव ४४ अङ्कले घटेर दुई हजार ९६४ दशमलव २० को बिन्दुमा झरेको हो । तर, बजार घट्दा पनि लगानीकर्ताको सक्रियता भने उत्कर्षमा देखियो । दिनभर तीन सय २३ कम्पनीका पाँच करोड ८६ लाख कित्ताभन्दा बढी शेयर किनबेच हुँदा कुल २६ अर्ब ५७ करोड ७४ लाख रुपैयाँ बराबरको विशाल कारोबार भयो ।

अधिकांश समूहका उपसूचकहरू राताम्मे हुँदा विकास बैंक, उत्पादन तथा प्रशोधन, म्युचुअल फण्ड र व्यापार समूहमा भने सामान्य वृद्धि देखियो । बैंकिङ, वित्त, होटल तथा पर्यटन, जलविद्युत्, जीवन तथा निर्जीवन बिमा लगायतका समूहहरूमा गिरावट आएको छ ।

आजको बजारमा समता घरेलु लघुवित्त वित्तीय संस्था र ट्रेड टावर लिमिटेडको शेयर मूल्यमा सकारात्मक सर्किट लागेको छ । यी दुई कम्पनीका लगानीकर्ताले सर्वाधिक कमाएका छन् । अर्कातर्फ, नारायणी डेभलपमेन्ट बैंकका लगानीकर्ताले भने सबैभन्दा धेरै ६ दशमलव ३४ प्रतिशतले गुमाएका छन् ।

कारोबार रकमको हिसाबले शिवम् सिमेन्टले सबैलाई उछिनेको छ । शिवम् सिमेन्टको मात्रै एक अर्ब दुई करोडभन्दा बढीको कारोबार भएको छ । त्यस्तै, कारोबार भएको शेयर सङ्ख्याका आधारमा लक्ष्मी सनराइज बैंकको संस्थापक शेयर सबैभन्दा अगाडि रह्यो ।