काठमाडौं । मुलुकको अग्रणी वाणिज्य बैंकहरू मध्येको एक, एनआईसी एशिया बैंकले साढे १३ करोड रुपैयाँभन्दा बढी मूल्यको संस्थापक सेयर बिक्रीमा राखेको छ । बैंकले आज, साउन ९ गते शुक्रबारदेखि ७ लाख ५ हजार ९५० कित्ता संस्थापक सेयर बिक्री खुला गरेको हो ।
बैंकले उक्त सेयरको न्यूनतम मूल्य प्रतिकित्ता १९० रुपैयाँ निर्धारण गरेको छ । यस मूल्य अनुसार बिक्रीमा राखिएको कुल सेयरको मूल्य १३ करोड ४१ लाख ३० हजार ५०० रुपैयाँ हुन आउँछ । लगानीकर्ताले न्यूनतम मूल्य वा सोभन्दा बढी मूल्यमा बोलकबोल गरी आवेदन दिन सक्नेछन् ।
को-को हुन् योग्य आवेदक ?
बिक्रीमा राखिएको यो सेयर खरिदका लागि बैंकका विद्यमान संस्थापक सेयरधनीहरु वा अन्य कुनै पनि इच्छुक व्यक्ति, कम्पनी, तथा संघसंस्थाले आवेदन दिन पाउनेछन् । यसले सर्वसाधारण लगानीकर्तालाई समेत बैंकको संस्थापक सेयरधनी बन्ने अवसर प्रदान गरेको छ ।
आवेदन प्रक्रिया र शर्तहरु
इच्छुक लगानीकर्ताले न्यूनतम १ हजार कित्तादेखि अधिकतम सम्पूर्ण कित्ताका लागि आवेदन दिन सक्नेछन् । ५ लाख रुपैयाँभन्दा बढीको सेयर खरिदका लागि आवेदन दिने लगानीकर्ताले स्थायी लेखा नम्बर (प्यान) अनिवार्य रुपमा उल्लेख गर्नुपर्ने प्रावधान राखिएको छ ।
यो सेयर बिक्रीको सम्पूर्ण व्यवस्थापनको जिम्मा एनएमबि क्यापिटलले लिएको छ । लगानीकर्ताहरूले बिक्री प्रबन्धकको कार्यालय, एनएमबि क्यापिटल, बालुवाटार, काठमाडौंमा साउन २३ गतेसम्म गोप्य शिलबन्दी बोलपत्र पेश गर्नुपर्नेछ ।
