काठमाडौं । देशको अग्रणी वाणिज्य बैंक, नबिल बैंक लिमिटेडले निष्काशन गरेको आकर्षक ब्याजदरसहितको ऋणपत्रमा लगानी गर्ने अवसर अझै बाँकी रहेको छ । साउन ६ गतेदेखि बिक्री खुला गरिएको ‘७ प्रतिशत नबिल डिबेञ्चर २०८९’ मा लगानीकर्ताको उत्साहजनक सहभागिताका बीच आवेदन दिने समय साउन २० गतेसम्म थप गरिएको छ ।
बैंकले ८ वर्षको परिपक्व अवधि भएको यस ऋणपत्रमा वार्षिक ७ प्रतिशतको स्थिर ब्याजदर प्रदान गर्नेछ, जुन हाल मुद्दती निक्षेपमा पाइने ब्याजभन्दा आकर्षक मानिएको छ । बैंकले ब्याज रकमको भुक्तानी अर्धवार्षिक रूपमा गर्ने व्यवस्था मिलाएको छ, जसले लगानीकर्तालाई नियमित प्रतिफल सुनिश्चित गर्नेछ ।
लगानीको विवरण र संरचना
बैंकले प्रति ऋणपत्र १ हजार रुपैयाँ अंकित मूल्यका दरले कुल ३ अर्ब रुपैयाँ बराबरको ३० लाख कित्ता ऋणपत्र निष्काशन गरेको हो । यसमध्ये १ अर्ब ८० करोड रुपैयाँ बराबरको १८ लाख कित्ता व्यक्तिगत तवरबाट (प्राइभेट प्लेसमेन्ट) बिक्री गरिनेछ भने सर्वसाधारणका लागि १ अर्ब २० करोड रुपैयाँ बराबरको १२ लाख कित्ता छुट्याइएको छ ।
सर्वसाधारणका लागि जारी गरिएको ऋणपत्रमध्ये ५ प्रतिशत अर्थात् ६० हजार कित्ता सामूहिक लगानी कोषका लागि आरक्षित गरिएको छ । बाँकी रहेको ११ लाख ४० हजार कित्ताका लागि आम लगानीकर्ताले आवेदन दिन सक्नेछन् ।
किन आकर्षक छ नबिलको ऋणपत्र ?
नबिल बैंकलाई रेटिङ एजेन्सी इक्रा नेपालले ‘इक्राएनपी इस्यूअर रेटिङ ए’ प्रदान गरेको छ । यो रेटिङले बैंक वित्तीय रूपमा सवल रहेको र यसले लिएको वित्तीय दायित्व समयमै पूरा गर्न सक्ने पर्याप्त क्षमता रहेको जनाउँछ । यसले गर्दा ऋणपत्रमा गरिएको लगानी न्यून जोखिमयुक्त मानिन्छ ।
कसरी दिने आवेदन ?
लगानीकर्ताले न्यूनतम २५ कित्तादेखि अधिकतम १२ लाख कित्तासम्मका लागि आवेदन दिन सक्नेछन् । ऋणपत्रको निष्काशन तथा बिक्री प्रबन्धकको जिम्मेवारी नेपाल एसबिआई मर्चेण्ट बैंकिङ्ग लिमिटेडले लिएको छ । इच्छुक लगानीकर्ताले सी–आस्बा सेवामा सहभागी बैंक तथा वित्तीय संस्थाहरू र ‘मेरो सेयर’ एपमार्फत अनलाइनबाटै सहजै आवेदन दिन सक्नेछन् । तोकिएको अवधिभित्र मागबमोजिम आवेदन नपरेकाले लगानीकर्तालाई थप समय उपलब्ध गराइएको हो ।
