काठमाडौं । साताको अन्तिम कारोबार दिन बिहीबार पनि शेयर बजारमा सामान्य वृद्धि देखिएको छ । नेपाल स्टक एक्सचेन्ज (नेप्से) परिसूचक करिब ४ अंकले बढेर ३ हजार विन्दुको नजिक पुगेको छ ।
बिहीबार नेप्से परिसूचक ३.७६ अंकले वृद्धि भई २ हजार ९८२.६४ विन्दुमा बन्द भएको छ । यस दिन ३२८ कम्पनीका ३ करोड ८९ लाखभन्दा बढी कित्ता शेयरको कारोबार हुँदा १८ अर्ब ४९ करोड रुपैयाँ बराबरको कारोबार भएको छ ।
बजारको प्रवृत्तिलाई हेर्दा, कारोबारमा आएका कम्पनीहरूमध्ये ९८ वटाको शेयर मूल्य बढेको छ भने १५२ कम्पनीको मूल्यमा गिरावट आएको छ । यसले बजारमा खरिद र बिक्रीको चाप लगभग बराबर रहेको देखाउँछ । आज चार कम्पनीको शेयर मूल्यमा सकारात्मक सर्किट लागेको छ । ग्रिन भेन्चर्स लिमिटेड, ‘ट्रेड टावर’, ‘सान्भी इनर्जी’ र स्वेत गंगा हाइड्रोपावरको शेयर मूल्य १० प्रतिशतले बढेको छ ।
कारोबार रकमका आधारमा राधी विद्युत कम्पनी अग्रस्थानमा रहेको छ । उक्त कम्पनीको ७७ करोड २१ लाख रुपैयाँभन्दा बढीको कारोबार भएको हो । फाइनान्स समूहको उपसूचक सबैभन्दा धेरै ३.२३ प्रतिशतले बढेको छ भने अन्य उपसूचकहरूमा सामान्य उतारचढाव देखिएको छ । हाइड्रोपावर समूहको शेयरमा पनि लगानीकर्ताको आकर्षण कायमै रहेको छ ।
बजार विश्लेषकहरूका अनुसार, बजार मजबुत गतिमा अघि बढिरहेकाले तत्काल ठूलो करेक्सनको सम्भावना कम छ । विभिन्न समूह र कम्पनीहरूमा लगानीकर्ताको आकर्षण चक्रिय रूपमा घुमिरहेकाले बजारले सन्तुलित वृद्धि हासिल गरिरहेको उनीहरूको भनाइ छ ।
