काठमाडौँ । हालै सर्वसाधारणका लागि निष्कासन गरिएको विकास हाइड्रोपावर कम्पनी लिमिटेडको प्राथमिक सार्वजनिक निष्कासन (आईपीओ) मा लगानीकर्ताको उत्साहजनक सहभागिता देखिएको छ। निष्कासन खुलेको केही दिनमै मागभन्दा ६ गुणाभन्दा बढी आवेदन पर्नुले कम्पनीप्रतिको आकर्षण र जलविद्युत क्षेत्रमा लगानीकर्ताको विश्वासलाई पुनः पुष्टि गरेको छ।

कम्पनीले असार १८ गतेदेखि सर्वसाधारणका लागि कुल २९ लाख ४२ हजार ७६० कित्ता साधारण सेयर निष्कासन गरेको थियो। निष्कासन तथा बिक्री प्रबन्धक प्रभु क्यापिटल लिमिटेडका अनुसार असार २० गतेसम्ममा नै १४ लाख ७८ हजार ८३९ आवेदकबाट १ करोड ८२ लाख २४ हजार ३२० कित्ता सेयरका लागि आवेदन परेको छ। यो माग गरिएको कुल सेयर संख्याभन्दा ६.१९ गुणा बढी हो। लगानीकर्ताले असार २२ गतेसम्म आवेदन दिन सक्नेछन्।

विकास हाइड्रोपावरले प्रवर्द्धन गरेको ४.५५ मेगावाट क्षमताको ‘माथिल्लो माछाखोला साना जलविद्युत आयोजना’ २०७९ साल फागुन १७ गतेदेखि नै सञ्चालनमा छ। आयोजनाले व्यावसायिक उत्पादन सुरु गरी राष्ट्रिय प्रसारण लाइनमार्फत विद्युत बिक्री गरिरहेको हुनाले कम्पनीले तत्कालै प्रतिफल दिनसक्ने अवस्थामा छ। निर्माणाधीन आयोजनाहरूको तुलनामा उत्पादन सुरु गरिसकेको कम्पनीको आईपीओमा लगानीकर्ताले कम जोखिम महसुस गर्ने भएकाले पनि यसमा आकर्षण बढेको हो।