काठमाडौं । प्रधानमन्त्री केपी शर्मा ओलीले मन्त्रिपरिषद् बैठक बोलाएका छन् । उनले आलोचनाका बाबजुद सरकारी निवास बालुवाटारमै आज साँझ बस्ने गरी बैठक बोलाएका हुन् ।
यसअघि बालुवाटारमा बारम्बार मन्त्रिपरिषद् बैठक आयोजना गरिएको विषयमा सार्वजनिक रूपमा आलोचना हुँदै आएको थियो । यस्ता टीकाटिप्पणीका बीच प्रधानमन्त्रीले पुनः बालुवाटारलाई नै बैठकस्थल बनाउँदा राजनीतिक वृत्तमा चासो पैदा भएको छ ।
आजको बैठकमा भारत र पाकिस्तानबीच बढ्दो तनाव, नेपाल राष्ट्र बैंकका गभर्नरको नियुक्ति, आगामी आर्थिक वर्षको बजेट तयारी, सरकारका तर्फबाट हालसम्म भएका कार्यान्वयनका अवस्थाहरू तथा समसामयिक राजनीतिक विषयहरूमा छलफल हुने जनाइएको छ ।
सरकारको रणनीतिक कार्यदिशा, आर्थिक योजना र कूटनीतिक विषयहरूमा समेत बैठकले मार्गनिर्देशन दिने अपेक्षा गरिएको छ । बालुवाटार बैठकले आगामी दिनमा सरकारको प्राथमिकता र धारणा स्पष्ट गर्ने विश्वास गरिएको छ ।
