काठमाडौं । आर्थिक वर्ष २०८१/८२ को चैत महिनासम्म आइपुग्दा नेपाली जीवन बीमा बजारले उल्लेखनीय प्रगति गरेको छ । नेपाल बीमा प्राधिकरणका अनुसार, देशभर क्रियाशील १४ वटा जीवन बीमा कम्पनीहरूले कूल १ खर्ब २६ अर्ब १८ करोड १२ लाख रुपैयाँ बीमा शुल्क संकलन गरेका छन् । यो संकलन १ करोड ३५ लाख ३९ हजार ५१० वटा बीमा पोलिसी बिक्रीबाट प्राप्त भएको हो, जुन संख्या आफैंमा जीवन बीमाप्रति जनचेतनाको विस्तार र जनविश्वासको सूचक हो ।
उक्त अवधिमा नेपाल लाइफ इन्स्योरेन्स कम्पनी सबै प्रतिस्पर्धीहरूलाई पछि पार्दै ३३ अर्ब १ करोड रुपैयाँ बीमा शुल्क संकलन गर्न सफल भएको छ । कम्पनीले विगत केही वर्षदेखि आफ्नो बजार हिस्सालाई विस्तार गर्दै आइरहेको छ र यो वर्ष पनि त्यसको निरन्तरताले पुष्टि गरेको छ ।
नेपाल लाइफपछिको स्थानमा नेशनल लाइफ इन्स्योरेन्सले १५ अर्ब ६४ करोड रुपैयाँ संकलन गर्दै दोस्रो स्थान ओगटेको छ भने एलआइसी नेपालले १४ अर्ब ३ करोड रुपैयाँ संकलन गर्दै तेस्रो स्थानमा रहेको छ । यी कम्पनीहरूले लामो समयदेखि नेपाली बीमा बजारमा आफ्ना सेवाहरू विस्तार गर्दै आइरहेका छन् र पछिल्लो तथ्यांकले तिनीहरूको विश्वसनीयता अझै बलियो बनाएको देखिन्छ ।
अन्य कम्पनीहरूको संकलन विवरण यस्तो छ:-
- हिमालयन लाइफ – १२ अर्ब ५९ करोड
- राष्ट्रिय जीवन बीमा कम्पनी – ८ अर्ब १६ करोड
- सूर्यज्योति लाइफ – ७ अर्ब ६५ करोड
- एशियन लाइफ – ६ अर्ब ४६ करोड
- सिटिजन लाइफ – ५ अर्ब ८ करोड
- सानिमा रिलायन्स लाइफ – ४ अर्ब ८४ करोड
- मेट लाइफ – ४ अर्ब ४४ करोड
- आइएमई लाइफ – ३ अर्ब ७७ करोड
- रिलायबल नेपाल लाइफ – ३ अर्ब ६९ करोड
- प्रभु महालक्ष्मी लाइफ – ३ अर्ब ६७ करोड
- सन नेपाल लाइफ – ३ अर्ब ८ करोड
जीवन बीमाप्रति जनताको आकर्षण दिनानुदिन बढ्दो छ । विशेषतः कोरोना महामारीपछिको कालखण्डमा जनतामा वित्तीय सुरक्षा र दीर्घकालीन योजनाको महत्त्वप्रति गहिरो बुझाइ विकसित हुँदै गएको छ । यसैबीच बीमा कम्पनीहरूले ग्राहक–मैत्री योजनाहरू, प्रविधिको प्रयोग र क्षेत्रीय विस्तारमार्फत बीमा सेवालाई सहज र विश्वसनीय बनाउँदै लगेका छन् ।
नेपाल बीमा प्राधिकरणले बीमा व्यवसायलाई पारदर्शी, दिगो र प्रतिस्पर्धात्मक बनाउने उद्देश्यसहित विभिन्न नीति तथा कार्यक्रम अगाडि सारेको छ । ग्राहक सेवा, पोलिसी नवीकरण, दाबी प्रक्रिया र डिजिटल रूपान्तरणमा देखिएको सुधारले समग्र बीमा क्षेत्रलाई आधुनिक बनाउँदै लगेको प्राधिकरणको दाबी छ ।
