काठमाडौं । राष्ट्रिय परीक्षा बोर्डले माध्यमिक शिक्षा परीक्षा (कक्षा १२) यही वैशाख २१ गतेबाट आगामी जेठ २ गतेसम्म नियमित रूपमा सञ्चालन हुने स्पष्ट पारेको छ । यसअघि नेपाल शिक्षक महासंघको आन्दोलनका कारण स्थगित गरिएको परीक्षा अब सहमतिपछि पुनः निर्धारित मितिमा सञ्चालन हुने बोर्डले जनाएको छ ।

बोर्डले परीक्षा व्यवस्थापनका सम्पूर्ण तयारी पूरा भइसकेको बताउँदै परीक्षा मर्यादित, अनुशासित र निष्पक्ष ढंगले सम्पन्न गराउने प्रतिबद्धता व्यक्त गरेको छ । निर्धारित परीक्षा केन्द्रहरूमा नै परीक्षा सञ्चालन हुने जनाउँदै बोर्डले केन्द्राध्यक्ष, शिक्षक, कर्मचारी, सुरक्षा निकाय, अभिभावक, सञ्चारकर्मी र सम्पूर्ण सरोकारवालाहरूलाई सहयोगका लागि अनुरोध गरेको छ ।

हालै विभिन्न सामाजिक सञ्जालमा बोर्डको लोगो प्रयोग गरी अनधिकृत रूपमा भ्रामक सूचना फैलाइएकोप्रति आपत्ति जनाउँदै बोर्डले त्यस्ता सूचनाहरूमा विश्वास नगर्न आग्रह गरेको छ । साथै, बोर्डले आफूले कुनै फेसबुक पेज सञ्चालन नगरेको र आधिकारिक सूचनाहरू केवल आफ्नो वेबसाइटमार्फत मात्र प्रकाशित हुने स्पष्ट पारेको छ ।

परीक्षार्थीहरूलाई निर्धारित समय तालिकाअनुसार तयारी गर्न अनुरोध गर्दै बोर्डले परीक्षा शान्तिपूर्ण रूपमा सम्पन्न गर्न सबै पक्षलाई संयमित र जिम्मेवार भूमिका निर्वाह गर्न आह्वान गरेको छ ।